La me fazza sto piaçer!
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Amor... baron | Edission e fonte ▼ | Per la festa de S. Marco. El bocolo a Regina → |
Bona sera, signorina!...
Mi so qua da stamatina
Che spazziso, che l'aspeto
Per amor del so viseto..,
E, za che la trovo sola,
Vogio dirghe una parola...,
Vogio almanco aver l'onor
De donarghe sto bel fior!
Bela bionda,
La risponda...,
La me fazza sto piaçer:
La me diga el so pensier!..
Gogio, forse, una figura
Che a vardar ghe fa paura?..
Gogio un muso da birbante
Che la stà cussì distante?
Sogio un mostro tanto odioso?...
O me torla per un toso
Che ghe piase lusingar...,
Che vien solo per... scherzar?...
Bela bionda,
La risponda...,
La me fazza sto piaçer:
Dove gala el so pensier?
Mi so un zòvene pulito
Che ga sempre filà drito,
E co tute quele tose
Che go avudo per morose,
So sta sempre assae discreto..
M'à bastà qualche baseto,
Carezzarle e sospirar...
Se la vol... se pol provar!...
Bela bionda,
La risponda,
La me fazza sto piaçer:
La me diga el so pensier!...