Per la festa de S. Marco. El bocolo a Regina
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← La me fazza sto piaçer! | Edission e fonte ▼ | El bocolo a Marieta → |
Regina mia, desmissiete!
Varda che tempo belo!
Senti che arieta tepida..,
Varda che sol, che çielo!...
Xe da per tuto un moverse
De tosi inamorai....
De tosi messi in cìcara
Pulito e ben giustai
Che va a portarghe el bocolo
A chi ghe stà nel cuor
Per dirghe in recia i soliti
Vocaboli d'amor...
Mi, inveçe, per distinguerme,
Ciapo la mia chitara
E vegno..., e coro a ofrirtene
Un de più belo, o cara!...
Varda xe questo l'unico
Fior che pol star sul peto
D'una putela vergine,
Anzi d'un anzoleto
Che, come ti, magnifichi
E freschi ga i colori,
Biondi i cavei coi bucoli
E un per de ocieti mori
Che i par de la to ànema
Do tenere strofete
Scrite per mi sul morbido
De quele do rosete!
E mi so qua a basartele
Finindo de cantar...
Perchè d'Amor la musica
Se deve scominziar!...