El bocolo a Marieta
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Per la festa de S. Marco. El bocolo a Regina | Edission e fonte ▼ |
Marieta mia, sto bocolo
Che te presento
El xe el fedel interprete
De quel che sento!...
El so profumo magico
El parla al cuor,
El ga un linguagio tenero,
Tuto d'amor!...
La so freschezza morbida,
Primaveril
No vinçe el to adorabile
Viso zentil...
Che me comove l'anima
Quando lo vedo...
Cussì che sento un grizzolo
Come de fredo:
Cussì che sento un brivido
Drento le vene
Che me fa star, lo credistu?...
In tante pene!...
Perchè me par de vèdarte
Indiferente
A l'amor mio frenetico,
Sincero, ardente;
Perchè, se mi te ciàcolo
De l'avenir...
Te vedo andar in còlera
E impalidir!...
Disendo che xe inutile
Parlar de questo...,
Chè mi za co le fèmene
Me stufo presto!...
Che mi sia stà volubile
El xe afar noto...,
Ma prima de conosserte
E restar coto!
Adesso mi son stabile
Ne l'amor mio...
Perchè mi in ti go un Anzolo
Mandà da Dio...
Perchè ti xe un Arcanzolo
Calà dal cielo...,
Perchè per ti, mia vìscere,
Perdo el çervelo!
Dunque, tesoro, credime
A la parola:
Mi no son più quel discolo...,
Amo ti sola!...
No starme far la rùstega,
La brontolona!...
Vòltite..., varda..., rìdime...
E torna bona!
No rifiutarme el bòcolo
Che te presento
Perchè el xe 'l vero interprete
De quel che sento!...
El so profumo màgico...,
El parla al cuor..
El ga un linguagio tènaro...,
Tuto d'amor!
La so freschezza morbida
Primaveril
No vinçe el to adorabile
Viso zentil!