La retirada

by Attilio Turco

3 La retirada Sonetti Veronesi Sonetti Veronesi/Parte V - Trento e Trieste Rico Toti El romanzeto Attilio Turco 1924 XX Soneti veronese

Indice:Attilio Turco - Sonetti Veronesi.djvu

Attilio Turco ―  Sonetti Veronesi  ― Parte V - Trento e Trieste

La retirada

1924

Edission original:	Attilio Turco, Sonetti Veronesi, Verona, Tipografia Operaia, 1924
Fonte:	Indice:Attilio Turco - Sonetti Veronesi.djvu

←  Rico Toti

Edission e fonte ▼

El romanzeto  →

LA RETIRADA

’Na sera, sul canton de ’n vicoleto,
     Ho visto ’na putela co ’n alpin;
     Ghe son passàdo a rente¹ e, un discorseto
     I se fasea tra lori, a pian-pianin:

Elo ’l disea: — l’è un’ora che te ’speto,
     Par poder ’starte insieme un pochetin —
     Ela: te’l sè, che gò me mama in leto
     E pena adesso² ò indormensà ’l putin —

— Presto i me sonarà la retirada,
     Se ciapo diese iorni de rigor...
     La fassenda l’è bela e terminada,

Parchè i me manda al fronte, a far l’amor...
     Ciao, dame un baso... — Ciapa³ e scapa via,
     Più tardi... se faremo compagnia! —

---

Note

1. darente ― vicino;
2. pena adesso ― tanto e quanto;
3. ciapa — prendi.