Le xe tute adulazion
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
Fonte: |
Indice:D'Alpaos - Svoladine e refoli, Venezia, Visentini, 1897.pdf |
← Vustu vegnir co mi? | Edission e fonte ▼ | Sior cosso..., no posso! → |
Se camino per la strada,
Se me fermo un momentin...
Chi me giudica, a un'ociada,
O una rosa, o un zensamin;
Chi me tol per una stela,
Per un anzolo del ciel...,
Chi ripete che son bela,
Ma superba..., ma crudel!..
Perchè a più d'un zovenoto,
Descolà da la passion...,
Go risposto co sto moto:
― Le xe tute adulazion! —
Co me svegio la matina
Sento in cale spassizar..,
Tiro suso la coltrina...
Per volerme assicurar:
Vedo i stessi zizoloti
Che vorìa becarme el cuor...
E che a furia de stramboti
Co çinquanta i fa l'amor!
Ogni dì, ligà a un mazzeto,
Su la piera del balcon
Trovo el solito biglieto..
Recamà.. de adulazion!
Ma sicome go el mio biondo
Che a trovarme sempre el vien...
E no cato el so secondo
Che me vogia tanto ben...,
Cussì mi, a sti spasemanti,
No savendo cossa dir...
Perchè i vada tuti quanti
Presto a farse... benedir,
Sto progeto alfin go fato:
Che se i vol aver razon,
Ghe la dago..., ma col pato
Che no vogio adulazion!...
- Note
- ↑ Questa poesia, inspirata da un bellissimo busto di donna, scolpito in marmo dal valente artista Benvenuti, fu premiata con Diploma d'onore al Concorso canzonettistico di tutti i dialetti d'Italia, banditosi l'anno 1895 dal giornale internazionale La Mascotte di Milano. ― Fu musicata dal m. Eugenio Lugo di Milano il quale ebbe pure il Premio al Concorso musicale indetto dallo stesso Giornale.