Sior cosso..., no posso!

by Giuseppe D'Alpaos

3 Sior cosso..., no posso! Svoladine e refoli Le xe tute adulazion No!... Gnancora no xe ora Giuseppe D'Alpaos 1896 XIX Canzonete

Indice:D'Alpaos - Svoladine e refoli, Venezia, Visentini, 1897.pdf

Giuseppe D'Alpaos ―  Svoladine e refoli

Sior cosso..., no posso!

1896

Edission original:	Giuseppe D'Alpaos, Svoladine e refoli, Venezia, Fratelli Visentini, 1897
Fonte:	Indice:D'Alpaos - Svoladine e refoli, Venezia, Visentini, 1897.pdf

←  Le xe tute adulazion

Edission e fonte ▼

No!... Gnancora no xe ora  →

SIOR COSSO..., NO POSSO! ¹

Ecolo qua: scomìnzielo
A farme invelenar?...
Andemo, zo..., in malorsega!
No 'l staga a pizzegar!

Insoma..., la finisselo?...
O corpo de quel can!...
Da bravo!... Cossa crèdelo!?...
De torse bone man?...

                    El diga, sior cosso...
                    Me làsselo star?...
                    Go dito: ― no posso!... ―
                    E ga da bastar!

Perchè no marcio in fustibus,
In guanti e in capelin...,
Perchè son tosa libera
E piena de morbin,

Elo me crede facile
A darghe.. libertà..,
Ma, me dispiase dirghelo,
Sta volta el s'à falà!

                    El diga, sior cosso...
                    Me lasselo star?...
                    Go dito: ― no posso!... ―
                    E ga da bastar!...

Co tute ste mignognole
Che lu me fa ogni dì...
Mi za capisso..., imagino...
Cossa che 'l vol da mi!

Se lu, sior mio, desmèntega,
No 'l sa l'educazion...,
Son bona de insegnàrghela
Co qualche stramuson!...

                    O, insoma, sior cosso...
                    Me làsselo star?
                    Go dito: ― no posso!... ―
                    E ga da bastar! …..

---

Note

1. Questa poesia fu onorata del Primo Premio (Medaglia d'argento dorato) al 2° Concorso poetico-musicale dalla Filarmonica Società Giuseppe Verdi bandito pel 1896, in occasione della tradizionale Festa popolare veneziana del Redentor.