Mio Perini, se vedè
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo III, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 3.djvu |
| ← Con tutto quel poder, e quel schiamazzo | Edission e fonte ▼ | Quel Baffo, che stà in campo a San Maurizio → |
Mio Perini, se vedè,
Che no vegno più al Caffè,
No credè, che sia malà,
4O sia fuora de Città.
Come gnente più me piase,
Stago a casa in santa pase,
Le botteghe, e la Comedia,
8E anca l'Opera m'attedia.
Mi no trovo cosa bona
Quanto, che la mia poltrona;
Là soddisfo el genio mio,
12E me par d'esser un Dìo.
Pago solo de mi stesso,
Senza aver gnessun appresso,
Con mì parlo, e me respondo,
16Nè a risponder me confondo.
Digo quello, che gò in petto,
Nè gnessun me fà più objetto;
Mi no temo in sta maniera
20No esser visto volintiera,
Che de mi gnessun se stuffa,
Nè de far qualche baruffa,
Come chi da qualche spiaggia
24Vede in Mar una Battaggia,
Se rallegra là in quell'ora
A pensar, che lù xe fuora,
Cussì mì, che son quà solo,
28Me la godo, e me consolo;
Poder dir, fuora me chiamo,
E de più gnente mi bramo;
Ghe sarave quella Dea,
32Che savè, che me recrea;
Se podesse star con ela,
Tornarìa spiegar la vela,
Tornarìa a rischiar al vento,
36El mio vecchio Bastimento.
In sto amor, che me dà pena,
La sarìa la mia sirena;
Se sta Donna se trovava,
40Quando Giove se cangiava
Ora in Aquila, ora in Toro,
Ora in Cigno, e piova d'Oro,
L'averìa lassà per quella,
44Son seguro, ogn'altra bella.
Come mi zà lasserìa
Tutte quante per Marìa.
Oh! Marìa piena de grazia,
48Che a vederte mai se sazia;
Se ti movi brazzi, e piante,
Ti xe pur tutta brillante;
Xe 'l to far cussì correse
52La delizia del paese;
Se ti canti in compagnìa,
Ti ti metti l'allegrìa,
Che tra'l canto, e'l to bel viso
56D'esser par in Paradiso.
Se mi parlo de sto ton,
L'è, perchè no son cogion,
Che cognosso fin al fondo
60Cosa ghè de bon al Mondo.