Nel zorno del matrimonio Tonelli e D'Agostini
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
ZORNO DEL MATRIMONIO
TONELLI E D'AGOSTINI
Per dirve, o sposi, un vero me consolo
Ò pensà far un svolo,
E andar lassù dove 'l gran libro stà,
Che decifra 'l destin dei matrimoni,
5E fa saver se i sarà storti, o boni.
A redosso del Pegaso montà
In manco che l'ò dito
Ghe arivo, averzo 'l libro, e trovo scrito:
«Che la cancelaria xe trasportada
10In cusina d'Imene, e che là vada.»
Ghe vado sul mumento,
E chi trovio là drento?
Amor vicin al fogo
In falda, scalmanà, che 'l fava 'l cogo.
15In vece de registri
Ghe gera cazzarole col viglieto
Del logo dove 'l piato era direto:
In vece de ministri
Moltissimi corieri,
20Vestii da camarieri,
Stava 'l piato a aspetar,
Che per el mondo se dovea portar,
E conforme che 'l gera, o rosto o lesso,
Se tirava 'l preludio, o in ben o in mal,
25Sul futuro sucesso
De quela tal union matrimonial.
Per esempio un pastizzo
Ai mii tempi per mi sarà stà fato;
E per qualche altro mato
30Una bona salseta,
Che almanco da novizzo
Gabia fato parer la goba dreta.
Ma mi me interessava
De saver le piatanze che se usava,
35E che più i consumava;
E za ghe gera in vista
A l'uso dei tratori la so lista.
Se vedeva disposti
Gran pastizzi, e gran rosti,
40Gran piatanze co l'agio, e gran limoni,
Alquanti macaroni,
Gelatine, gran salse colorate,
Dei fruti, pochi dolci, e gran salate.
«Cossa mai, digo alora,
45Ghe sarà parechià per sto imeneo?»
Vardo, esamino, cerco, e salta fora
Un bel piato de cuor coto sul speo.
Mi 'l preludio ò capio,
E da de là partio
50Vel vegno, o sposi, subito a schiarir:
«Co 'l cuor xe rosto no gh'è da che dir.»