Scandali
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Matina de bosco | Edission e fonte ▼ | Un disnar in campagna → |
Me morosa l'à podudo
farse un abito da festa
inguarnido de veludo...
Ma guardè, guardè che testa:
l'à vossudo e stravossudo
lassar fora da la vesta
un tocheto de col nudo!...
Pò, la dise che l'è onesta!...
E così no g'ò più chiete.
Cosa mai dirà la gente,
cosa mai diràlo el prete?
Mi lo so, che no se peca,
lo capisso, no l'è gnente...
Ma me seca za, me seca!
Parchè, intanto, ci la vede
caminar così scolada,
cissà mai cosa i la crede,
e che strassa de velada
i ghe taca – i trà la rede,
par ciaparla a la pescada...
Manco mal che mi g'ò fede
ne la Nina inamorada!
Ma che arie, che boresso!...
La va via come un galeto;
la s'avesse almanco messo
torno al col, 'na siarpa, un velo,
so i mi... un nastro... un fassoleto?
Maledeta! Gnanca quelo!