|tipologia=poesie
}}
<poem>
- Bela fia del nostro popolo,
Alta, drita, ben tressada,
Co te incontro per la strada,
Me se infiama testa e cuor
<pages index="Le Rime Veneziane e Il Minuetto.djvu" from=118 to=120/>
I caveli d'oro in ordene
Rancurai coi fiori in banda,
L'ocio too che ragi manda,
La to boca, mìo d'amor,
Le to spale, el pèto candido,
Me rapisse, me inamora,
Za la freve me divora,
Note e zorno penso a ti.
Vien co' mi; regali splendidi
Te farò d'oro e d'arzento,
Tolme, Cate, a sto tormento,
Bela Cate, vien co' mi.
- Caro sior, de le so frotole
Son za stufa, son secada;
Caro sior l'à falà strada,
Toni solo xe 'l mio amor.
Toni solo, quel bel zovene
Che in pope come un dio,
Mile tose da marìo
Me lo invidia e lo ga in cuor.
Col mio Toni onesta e povara
Vogio star fin a la morte,
Trista o alegra la mia sorte,
Toni solo vogio amar.
- Oro e arzento e zogie splendide
Te darò, belezza rara,
Zorni tristi, vita amara,
Te farìa Toni passar.
De brocato e seda l'abito
Te farò secondo el gusto,
Sto qua in tela xe ormai frusto,
L'è smarìo, nol te va ben.
- Caro sior, xe tuto inutile,
Toni solo el cuor m'infiama;
Tela o drapi da gran dama,
Bate istesso el cuor in sen.
</poem>
|