Su l'Adese

by Berto Barbarani

3 Su l'Adese I due canzonieri I due canzonieri/Libro III - Le montebaldine La canson a la primavera Al tornar de le ròndene Berto Barbarani 1900 XIX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro III - Le montebaldine

Su l'Adese

1900

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  La canson a la primavera

Edission e fonte ▼

Al tornar de le ròndene  →

SU L'ÀDESE.

     Se la luna la destende
un ninsol¹ che te inamora,
belo bianco, sensa mende
come un'ala de cocal...²

     Ci me impresta la sisora,³
da taiarghene un tocheto,
che vôi farte un bel corpeto,
che vôi fartene un grombial?

     Za la luna l'è un tipeto,
da no aversene par mal.

     Se la luna la se sconde,
se le stele le se vede,
zo ne l'acqua fonde fonde
co i ocieti in verso al ciel...

     Ci me impresta la so rede,
da pescarte sti lumini,
che vôi farde du recini,
che vôi fartene un anel?

     Ci me impresta i so piombini,
ci me impresta el so batel?

     Se fa nuvolo e gh'è scuro,
se le grilie⁴ el vento el scuna,
e un molin che fa susuro
el se màstega el so gran,

     co 'l vestito fato a luna,
co i recini fati a stela,
su 'na barca sénsa vela,
vôi condurte via lontan...

     Co una man soto l'assèla,
co 'l timon ne l'altra man...

---

Note

1. ninsol: lenzuolo
2. cocal: gabbiano
3. sisòra: forbice.
4. grilie: imposte della finestra.