Tutti tenda al mistier soo
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte prima, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 1.djvu |
| ← Quesito per Nozze | Edission e fonte ▼ | El Zorno de san Martin → |
Bertoco capariol,
Che gode della fama in quel mestier,
Frugnando in un corbato,
Se ponze, e assae ghe diol,
E par grave ferìa ch'el s'abbia fatto.
Dolori el soffre tutto quanto el dì,
La notte el ga sgionfezza, e via cussì,
E l'è ridotto con un brazzo solo,
Perchè quello amalà xe messo al colo.
Co tutti sti dolori
El cerca professori,
E drento el batte in un
Certo da no augurarghelo a gnessun.
Con classica impostura
L'osserva la feria,
E disendoghe su con cargadura
Medico-pattologica eresia,
Gh'ordena un certo impiastro cavalin,
Che toca, e strupia, o pol far pezo infin.
Strissima, dise el capariol, co vegna
Zoso la mia tartana,
Pagarò la mia prima obbligazion
Co un toco de ton,
Ella sa chi son mi, mare de diana.
Te conosso, ghe dise el professor,
Farò quel che se aspetta,
Date coraggio se ti ga dolor....
Ola bada ch'el ton sia de panzetta.
Bertoco ga el ceroto,
Ma più el dolor xe in moto,
El ga tanto de man, tanto de brazzo,
El pianze, ma de cuor poro gramazzo.
Co quel ch'el ga promesso
Doman l'è dal dottor:
Nol lo trova, ma xe tutto l'istesso,
S'el regalo riceve el servitor,
Che soddisfo del ton,
E tratto in compassion
Vol anca lu vardar quel mal furioso,
Visentin de nazion, dunque curioso.
El riconosce subito,
Che un spin quel mal ghe origina:
Senza un momento perdarse
El ghe lo tol prestissimo,
E sollevà xe un misero
Quasi dal dito al fato,
Da un dolor, ch'el facea convulso, e mato.
Passà qualche momento,
Ecco l'eccellentissimo dottor,
Che vede assae contento
Quella slepa de ton:
Ma sentindo la fatta operazion
Dal bravo servitor,
Se mette in serio, e dise
Co sto impazzarve dove no ve toca,
L'utile avè troncà dalle raise,
Magnarè delle menole sior coca.