El bianco spin
|
Edission original: |
Il dialetto e la lingua, Antologia vernacola, a cura de Vittorio Fontana, Verona, M. Bettinelli, 1924 |
|
Fonte: |
| ← Mama, son straco | Edission e fonte ▼ | L'ino del contadin → |
O bianco fior de spin,
Come ’na perla al sol
Te slusi ne l'aprile.
Par le sese 1 del campo e del giardin
Dolçe te spandi odor,
Quando che s-ciopa el caldo ventesin
Le to foiete, me se verze el cor.
E penso a ti che amor
Te fa de neve el col,
Le man bianche sutile.
Una ghirlanda voi farte per la festa
De queste bianche stele,
Le metarò su la to bionda testa
Par che te sii regina fra le bele.
Canta le pastorele,
E pianze el rossignol
Nel bosco e par le vile;
E mi che sento una gran bampa in sen,
Par ti canto e sospiro,
Ne la note de luna, al çiel seren,
L’aria, che sa de bon, con ti respiro.
Nel bianco fior te miro
Creada, per mi solo,
O anima gentile.
- Note
- ↑ siepi.