Il primo canto de Orlando furioso in lingua venetiana
Composto per Benedetto Clario per dar piacer a gli suoi amici
|
1554
|
|
Edission original: |
Benedetto Clario, Il primo canto de Orlando furioso in lingua venetiana, Venezia, Agustino Bindoni, 1554 |
|
Fonte: |
Indice:Clario - Il primo canto de Orlando furioso in lingua venetiana, Venezia, Bindoni, 1554.djvu |
| Edission e fonte ▼ |
.jpg)
Le Fie, l’Amor, i Zovenetti, armai
Le cortesie el despiaser ve digo,
Che fu in tempo che vene i Soldai
in Franza a castigar el so nemigo,
tutti vegniva con le Spade a lai
drio de Agramante che giera un intrigo,
per vendicar la morte da un de Troia,
che fu squartao per assassin dal Boia.
Diro de Urlando matto innamorao,
mo no pense che ve diga busie
comuodo el giera per tutto affadao
cetto cha sotto le suole de i pie,
se da culia che tanto me ha strigao.
che non me laga dir i fatti mie,
me sara dao tanto de saor
che me possa attachar al Bataor.
Ve piase sier Apollo incoronao
de Ravanelli, e di foie de Ortiga,
per dar piaser al vostro parentao,
che fa per i Poeti tal fadiga,
accettar quel che subito, ha pensao,
un vostro che a dirr versi ne se intriga
e se vu forsi i vore puo imputar,
elo ve dona zo che'l ve puol dar.
Sentire anche de tutto 'l Conseio,
che menzonar con laude adesso, voio,
de Venere che corso piu dun meio
per soccorrer Adon, e no ve soio,
Pallas, e Giove i e puo tutto 'l colleio
me vegna drio infin che impiro el foio,
un fier Apollo aldirne, e no ste in ziogo,
che i versi no romagna senza liogo.
Urlando che gran pezzo immatonio,
romase per amor de Anzelichetta,
arbandone la mare, e'l pare, el fio,
e i vestimenti le arme, e la baretta,
e puo tornete con la grama indrio,
che sotto i monti regniva una setta,
de Francesi, e Todeschi de Alemagna
con sier Carlo passuo alla campagna.
Per dar un do da drio, a i so nemisi,
digo Agramante, e Marsilio a refuso
che gran zente mene sotto Parisi
con vogia de cazar Carlo in dun buso,
ma ge intravene quella de i amisi
che vosse contra Marco andar insuso
fina a le rive de Marghera strachi
po torne indrio con le pia in di sachi.
Ma se che a Urlando la rioda se volta,
per non haver le cose ben pensae
ge vien roba la donna, e no' ne ascolta,
quel che se dise per quelle contrae
credo che in sonio la ghe fosse tiolta,
senza tirarle pur do cortelae,
ma fu, l'Imperador per una berta
che ghe la tosse, e la mene coverta.
Una certa custion giera nasua.
fra i do pi forti, e brigenti Cusini
per veder la so donna tutta nua.
ardeva in fogo come i solfarini
Carlo che vecchio, ha la barba canua:
e che l'aiuto vol de i paladini
fese il Ruffian a punto in quella sera
per desfamar el Duca di Baviera.
Puo la promesse in presio a chi vegniva
contra de i Sarasini a la battaia
taliter che la grama de esser viva
se diol, e pianze per tanta canaia
sora de mi se la ghe romagniva
de la Zaffetta levava la taia
ma ben laide che un Duca fu preson
e reste arbandonao el pavion
Cusi in quel pavion desproveduo
la povera donzella ghe romase
Dio vol che un Cavaletto de veluto
la vede e saltar suso assai ghe piase
e per scampar tal caso intravegnuo
lande della fersora in de le brase
perche corando per le stranie vie
se scontre in un grandon che andeva a pie
La corazina indosso prima haveva
la meza testa la targa, e la mela
e piu lezier per la strada correva
che no va per la Brenta una burchiela
spaurosa vilana no pianzeva,
quando vede una bissa comuodo ella
da laltra banda el Caval muove, e storze
che de culu che ghe vien drio le acorze.
Custu signori quel paladin giera
signor de Monte Alban, e de Amon fio
che per vegnir da Verona, a Peschiera,
el Cavallo de man ghe giera insio,
col balchette la Donna in de la ciera
la cognoscete da luntan un mio,
che la giera culia dal pie solo
revolto co sta i Gambari in cogolo
Volta indrio el ronzin o bella fia
pur spironando, e molando la brena
liziera che la no fu sentia
quanto xe da Muran a santa Lena
dise al Cavalo horsu fame la via,
varde se le una bestia da caena
ma tanto ande la putta inanzi e indrio
che al fine la se trovete sora un rio
Sora quel rio Feragu se troveva
tutto suao e tutto ruzenio
per una so fadiga che elo feva
poveretto che el corse piu dun mio
cusi el gramo per bever se fermeva
ma'l romase un minchion al fin da drio
ghe caze lelmo el cao ghe reste nuo
chel someiava a un corbo de Paluo.
Feva custia co fa una putanela
quando la xe in ganzega a scampar via
chel so berton ghe drio co la cortela,
la se' caza a criar, e core via
Feragu che la vede a star in sela
zaffa la spada, e core in su la via
cosi la cognoscete a un cigo a un subio
che Anzelica la giera senza dubio.
E perche da custu la fo tegnua
anchora havea caldo el redeselo
dise a l'elmo to posta va via
no te voio cercar piu va al bordelo
e tutto a un tempo la spada desnua
e va contra Renaldo questo e'l belo
e la se fica a rider se no falo
che un e senza elmo, e l'altro no ha cavalo.
Proprio come d'Avosto do imbriaghi
quando che i xe in duna taverna in pie,
che un dise a laltro voio che ti paghi,
e quel risponde no ne i fatti mie
cosi co i denti co i pugnai co i aghi,
se morsega, se da de le ferie,
in tanto ella adopera l'anelloa
sparisse via e inchaga a questo e a quello.
Po che i sa da de i pugni rotto el muso
e sa tratto in del cao bocali e gotti
e tole e sassi xe andai a refuso,
per esser da la stizza e dal Vin cotti,
mistro Renaldo se cate in tun buso,
puo diseva fradello e semo rotti,
qua se demo de i pugni e se ferimo
e puo come castroni romagnimo.
Che pensistu d'aver mo fatto ancuo
anchati come mi xe pur ferio,
da quel lusente razo che vegnuo,
che t'a fatto d'amor tornar indrio
mo per haverme un poco retegnuo,
ti no l'havera za alla fe de Dio.
per che la s'ha cazza drento una grotta,
e n'ha caza da drio una carotta.
Ma daspo che ti l'ami nu anderemo
ti e mi insieme a traversar la via
a questo muovo la retegneremo
puo tiola col malan che Dio te dia,
e quando in liberta nu l'haveremo,
ghe faremo un trentun per cortesia
come intravenne a una da Moian,
chel sentar no ghe stette troppo san.
Questa rason al Sarasin piaseva
e cusi fu dispartia sta zuffa
e tal amor e tal paese naseva
che fo messa da banda sta baruffa
e al partir de lacqua che lo feva,
nol lassa a pie con durlindana muffa
ma dise monta qua su'l caval longo
che ti sa che in dun hora nasce un fongo.
O gran materia de bravazzi antighi,
che i voleva do gambe in dun stival
puo no i saveva insir de quei intrighi
ste pur aldir quest'e un bel Carneval,
i va per boschi, e sconvien che i s'ortighi
e cusi fa do zuche senza sal
quatro spironi el buon caval ponzeva.
fin che in s'una croserai azonzeva
E come quel che no considereva
che strada mai podesse tior la fia
perche s'in duna come in laltra steva
le forme de i cavalli in de la via,
cosi senza magnar tutti do andeva
Renaldo e Feragu sparte e va via
ma tanto el Sarasin va in qua in la
che dove el giera el se retrovera.
Digo chel se trovete sora el rio
la dove ghe caze la meza testa,
daspuo che della donna el fu falio
landar senza, par cosa dishonesta,
desmonta del Cavallo sto scachio'
e da' cercar la celada no resta,
ma la xe tanto caza in del sabion
che se'l la cerca el restera un menchion.
E tosse un ramo zo de un saleger
e puo co i denti presto el remondeva,
e come un putto fa dentro un armer
cusi ello per il fiume bisigheva
ma stando un puoco l'Argalia forner
in si de sotto lacqua chel nueva
co la Celada in de la destra man
da laltra banda un Concolo de pan.
El giere armao fina al petto digo
la meza testa in man el cao nuo,
pur quella meza testa che lintrigo
perde un anno a cercarla el di de ancuo
a Ferragu parlette da nemigo
digando fio de un beco mal nasuo
te faro far in acqua un cao rio
se ti te pensi a tior quel che xe mio.
Ricordati animal che ti amacessi
de Anzelica el fradello e son quel mi
daspuo laltre arme ti me impromettessi
butarmi questa qua fra puochi di
dime perche ti no ghe la mettessi
a questo modo, no se fa cusi
vergognate da ti pur traditor
che ti xe sta de fede mancador.
Ma se de haverne una mior ti ha voia
mi te la insegnaro sier vis de carta
Renaldo Urlando no creder che soia
ghe nha un mior che elli vat'a squarta
e hevere de qua ciera de boia
se ti no vuol che st'anima se sparta
che se vegno de fuora co sto Albuol,
mi te bastonaro can mariol.
Quando el senti del spirito la vose
el se pelete tutto da paura
e steva co fa un gran sacco de nose
che no se muove che ha la panza dura
ma ve zuro signori per sta crose
che ve ne aridere de sta ventura
el ne laghette un segno e qua vel conzo
le calze piene de Ambracan desconzo
E no podendo dir altra busia
chel coverzisse quel chel ghe diseva
el stava co fa un mutto su la via
no parlava, no aldiva, e no cigneva,
ma puo el zurette in la so fantasia
che altra meza testa el no voleva
se non quella del gran sbisao Urlando
che tutto el mondo andeva manazando
E fese un certo vodo un sagramento
de voler vender tutte le so vacche
sel podeva andar via a salvamento
dal di chel se caghette in de le lache
e per trovar el paladin contento
va pittocando con un per de sacche
ma intravien a Renaldo altra ventura
che de questo pelao non ha più cura
Ma puoco va st'altro sier Chichibio
chel vede el so Caval vegnerse adosso
ma'l xe cusi minchion Bortholamio
chel no lo tien sto buffalorum grosso
el ghe sara mo del naso da drio,
chel Caval corre, e traversa ogni fosso:
ma laghemo Renaldo andar per oio
che de madonna Anzelica dir uoio
La va scampando per boschi, e montagne.
per lioghi scuri, e piu desabitai:
el cazer de le foie, e de Castagne
ghe feva rasonar mille sbisai
la no pora coverzer le magagne
co l'anello che i niazi ghe ha passai
se la vede de arbori le ombrie
par che Renaldo se ghe attacha a i pie.
Custia corre co fa una Cavretta.
quando la corre in di boschi leziera:
che la vede a so mare dar la stretta
al Liompardo la dove la giera
cusi scampava questa poveretta
azo no ghe rompesse la baschiera
e se la passa trista piera o'l zovo
ghe par d'esser d'ognhora in bocca al lovo.
Quel di e la notte e meza la matina,
in qua in la sempre la cavalcheva.
tanto che la rivete a la Marina,
onde un piasevol fresco se moveva
una Fontana alta, e una china
le herbette tenerine removeva
fazando un dolce son suave e human
rotto fra i sassi, e si correva pian.
E qua d'esser segura ghe pareva
da lonzi da Renaldo piu dun meio
da la via stracca el caldo ghe noseva.
de reposarse la pie conseio
tra fiori, e foie custia desmonteva
e laghette el cavallo da fameio,
ello co la so brena se travaia
manzando puoco fen e manco paia
Puoco lonzi una ciesa descoverta
de spini e riose che a torno fioriva
a londezar la putta steva a lerta
vardando perche il sol no ghe vegniva
la strania nuova in mezo giera averta
e per dolcezza el cuor se ghe averziva:
le rame gieran zonte co le foie,
liogo da satiar le carnal voie.
Ghe feva letto tenere herbesine:
che chi passava a dormir invideva
la donna che le sente molesine
se butta in mezo: e puo se indormenzeva
ma puoco stette le membre meschine
che sentir un corrier ghe pareva.
se lieva, e tase, e vede che dun squero
insiva fuora un huomo armao de fero.
Sel xe amigo o nemigo ella non puol,
considerar ne manco uscir de impazzo,
ne vardar chel se sia ela no vuol
che la dubita cazer in tun lazzo:
ello desmonta e dise oime me duol
la testa e puo se puza in sun un brazzo,
col cao in sen e la borsa leziera:
che pareva cambiao in duna piera.
E piu dun'hora pianzando a sta foza
romagnire custu tutto gramio
puo comenzerte al son duna gran pioza,
lamentarse co fa un che sferdio
che per piatae averave una loza,
tutta movesta da nanzi e da drio,
ma'l lagremar el doler no se sparte,
ch'el someieva un che perde alle carte.
Passion difesa chel cuor strazi e brusi
come un Fauro che adopera la lima
che diebbo far se til tagi e descusi
causa che de la morte vago in cima
non ho podesto apena haver do busi
che la mia voia domandete in prima
ma daspuo che non ho frutto ne fior
si piu la truovo ghe cavaro'l cuor.
Someia la donzella al bocoletto
quando'l xe despicao ze del roser
e chel va in man a qualche zovenetto
el xe in gratia a madonna e a missier
ma quando se ne da centto al marchetto,
la va in desgratia fin de un zavater
e par puo che ella perda el bon odor
quanto che ghe de el Ciel del primo amor
Ma non si presto da presso la mare,
la bella puta de casa ha movesta
che se zonze in man de zente lare,
la deventa ribalda e deshonesta
ma intanto che la puol veder so pare
ogni di l'ha piaser, ogni di sesta
ma se la'l perde, perde soni e canti
anche la prima gratia de i amanti
La se ghe infiga e co i altri sinstizza
sol a custu ghe da la strada larga,
fortuna fa che un puoco la pellizza
possa tocarghe con la so bottarga
che vede se le rossa, o se le rizza
che puo voio ogni di portar la carga
senza mai descargarme se no vago
al liogo onde poro satiar el drago.
Se nigun me domanda chi e custu
che sta qua zo co la panza roversa,
mi ghe respondero che son colu
che a una donna a strazao la traversa
e drio anchora sel mascolta lu
che la fortuna me stada perversa
e tutti quanti ha maniza custia
e mi no ghe no habuo la parte mia
Appresso onde'l Sol caze son vegnuo
dal cao de Oriente infina qua
e caminando per l'india ho sapuo
che dal berton ella giera scampa
puo intesi un caso che m'e despiasuo,
che la fu retegnua e impresona
che la metea in si una via piana
per volerghe giostrar in la quintana
Son stao in campo e me par d'haver visto
che Venetiani ha habuo grande honor
quando che i fese de Padoa acquisto
che tiolta la ghe fu da traditor
e Vicenza, e Verona volse Christo
che i have anche Bressa per amor
tutto'l Treviso, e Furlani acquistai
cusi i rebelli romase agrizai
Infina che custu pianze e se bate
e che da i occhi laqua tivia insiva
queste e de l'altre parole combatte
ma no besogna che le metta a riva
la ventura e la sorte qua se imbatte
che Anzelica ghe era che lo aldivi
cusi in dun hora, e in dun ponto intravien
quel che in mille anni, e piu no se se ben
La bella donna co la volontae
el lassa dir, e pianzer, e si'l dunia
senza mandar pur via la crudeltae,
che la no'l vuol perche no la pecunia,
ma dura e falsa fra le scelerae
la no ghe pensa, e manco se l'insunia,
la stima'l mondo un Cievalo da rio
varde, se lamera questo zudio
Pur stando in de quei boschi senza golo,
ghe vien vogia da tuor custu insieme
che chi sta in lacqua salsa fina al colo:
ben e bizarro sel no dise aideme
mo se questo oseletto pia suolo,
no ghe n'havera un per tutto leme
rason e ben: ch'ella se'l tira drio
perche la sa quanto el xe ben fornio
Ma non per questo la pensa la doia
che lo destruze per farlo lezier
e restorarlo, e cavarghe la voia
come che fal mario e la mogier:
ma una sention con una soia
contegnirlo in speranza el fa misier,
ella promette de prestarghe'l vaso:
menandolo da bufal per el naso.
E fuora de la ciesa si imbrigosa
la vien in mostra a usanza de Paon,
come anche tal volta fa una Sposa
quando la vede el novizo in zipon,
e zonta dise per conzar la giosa
la pase sia con ti che ti ha rason:
e no lo vogia i Dei tanta heresia
che ti habbi inver de mi sta fantasia.
Non mai la cara mare tanto galde
quando la vede appresso d'ella el fio
quando piu zorni le lagreme calde:
fa che no vede el so tornar indrio
cusi del Sarasin le voie calde
la pia stretta el cervello ha in chibio
e la vol via menar al so poder
puo che lha quel chel no pensava haver.
E pien de matta: e de piasevol voia,
corre a la donna e co i brazi la strenze
proprio come serave el mistro boia.
quando che i Zaffi un pia: ch'ello spenze
ma no pense che qua no se ve soia:
comuodo la dandar ella el depenze
cusi ella spiera sora ele Sarasin:
che lacompagnara quel Tabachin.
Ella ghe dise tutto in recchia pian
dal zorno c'hella el mande a domandar
chel ghe fese un servisio da Ruffian
da meza notte andarla a compagnar
e come Urlando la varde da un Can
che la voleva certo morsegar
e chella haveva salva el primo fior
che la voleva darghelo mior.
Forsi che giera maza, mi no'l credo,
a chi cognosse la so voia el falo
ma lu el credete presto che mi el vedo,
pur assae volte insin tuora de balo
amor dun homo aspetto lo sa ledo,
e se le un homo ello mostra un Cavalo
ghe fu credesto chel misero puol
dar presto spazzamento a quel che vuol.
Sel matto Cavallier non ha sapuo
piar per so matieria el tempo bon
so danno sia, el sorbira del bruo,
chel Ciel no ghe dara piu si bel don
in del so cuor el parla tutto ancuo
ma mi per invidarlo qua non son
che ligar no mi voio tanto ben
che puo me doia, che dorma sul sen
La fresca Riosa adonca sunero
se stago tardi no la poro haver
so che a costia cosa no faro
che la no lhabia tutto per piaser
a ben che scoroza la trovero
che la no vora darme el mio voler
ma no staro per pernise, o starne,
che mi no metta el mio disegno in carne
Cusi ello dise e cosi apparichieva
per far quel fatto ma'l senti un remor
chel vesin bosco e le recchie intoneva
a al so dispetto ghe cale l'humor
la meza testa in cao el se cazzeva
per voler dar al Cavallier strior
monta a Cavallo e ga messo la brena
e puo zaffa una lanza da man piena.