Verxi el menu prinsipałe

Wikisource β

La bionda in piassa

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
La bionda in piassa
1911
←  In Valdonega Edission e fonte ▼ La storia de na sartina  →

[p. 99 modifica]




La bionda in piassa
[p. 100 modifica] [p. 101 modifica]


I.


     Prima che da le tane de le case
i colombi se sveia a i primi ciari,
soto i nidi de passare che tase,
de rondine che dorme su i granari;

     prima che 'l sol pitura le cornise
del palasso Mafei e la fontana
manda un udor de tera e de radise
bagnade soto i colpi de acqua sana;

     prima che se desmissia le boteghe
co le vetrine che se fa stimar,
dove cominsiarà tute le beghe
de le donete che se fa imbroiar:

[p. 102 modifica]


     con do seste che se nina
che te carga i brassi e i fianchi,
dal canton de la galina
te si za a traverso i banchi;

     primo sol de la matina
ti te passi e come un'onda
te sconquassi l'aria fina
co la testa tuta bionda;

     el sudor el te tormenta
zo dal col e da le spale,
i colombi i se resenta
co le pene de le ale,

     i merleti del palasso
i se indora col leon,
i colombi i porta a spasso
la so solita canson.

[p. 103 modifica]


II.


     Con quele spale che g'à serti scati,
quei scati de ambission e de pretesa;
con quel ridar che mostra i denti nati
in te 'na boca fata de sieresa:

     la se inzenocia a torno a la fontana,
la rebalta ne i sesti la verdura,
la le resenta e la le fa più sana
soto quei polsi che no g'à paura,

     e da la testa i so cavei de oro
i manda fora tuto el so saor,
sèra quei oci bionda che al to moro
ghe se rebalta i scrupoli nel cor!

[p. 104 modifica]


     Le donete le g'à l'aria
de ci tase e le discore,
le fa finta che par aria
le sia nuvole che core;

     e la bionda a la fontana
che de soto vento via
la capisse la campana
che g'à nome gelosia;

     la se indrissa tuta quanta
co le man che le ghe brusa,
le donete le se sfanta
co l'aiuto de 'na scusa:

     dal palasso a la berlina,
dal leon al capitel
guai al mondo stamatina
se i ghe toca el so putel!

[p. 105 modifica]


III.


     S'à visto sotto i rissi de la bionda
slusarghe i oci come brasa viva;
è passà un desiderio come un'onda
che sospira sercando la so riva.

     A' tremado sul banco le balanse
e l'ombrelon l'à fato un complimento;
è rugolà par tera le naranse
da un sesto che l'è stado poco atento.

     Co 'na scusa trovada lì par caso,
col desiderio nato su dal cor,
a l'ombra de quel sesto el primo baso
s'à confuso co i boti de la tor.

[p. 106 modifica]


     E col ciaro de la luna
che de note se inamora,
gh'è quel baso che 'l se cuna
che ogni tanto el salta fora

     co 'na musica che nasse,
che la sbrissia che la core,
la fontana no g'à passe
su la Tor bate le ore.

     Oh che pian che te te nini
baso santo, cosa gh'eto?
I colombi i se fa inchini
e la luna ghe fa el leto.

     I colombi à fato rassa
su la tana de un granar,
le donete de la piassa
le à finì de ciacolar.