La mia contrada

by Giglio Padovan

3 La mia contrada Rime in dialetto veneto di Polifemo Acca Chi xe l'autor? In morte d'un gato Giglio Padovan 1873 XIX Poesie triestin

Indice:Rime in dialetto veneto di Polifemo Acca.djvu

Giglio Padovan ―  Rime in dialetto veneto di Polifemo Acca

La mia contrada

1873

Edission original:	Giglio Padovan, Rime in dialetto veneto di Polifemo Acca, Trieste, Appolonio & Caprin, 1875
Fonte:	Indice:Rime in dialetto veneto di Polifemo Acca.djvu

←  Chi xe l'autor?

Edission e fonte ▼

In morte d'un gato  →

LA MIA CONTRADA. (1873)

     Che no i me parla de la via Toledo,¹
Dei bacani de Londra o de Parigi;
Per carità, che no i me vegna fora
Con Babilonia, Sodoma e Gomora,
Co i urli de le done e dei putei
Quando el Vesuvio à sofegà Pompei:
Chi voi veder l'inferno in miniatura
E fra quel tananai² perder la recia.
Che vegna, cazza, a la Bariera Vecia.
     Se 'l matutin chichirichì del galo
A desmissià l’apostolo San Piero,
Qua tenori e baritoni sfogai
Co mastele de rave e petorai;
Conzaori de lastre e de fersore.
Negozianti de sorbole e de more,

Luganeghe, persuto e castradina,
Da la roba più scarta a la più fina:
Fritole, peverini e mandolato,
Da i boconi de lusso a quei del gato,

     Se no ve basta el son de la manera
Ch’ogni momento fa stremir la tera,
Sentirè le sbragiae de qualche mulo
Che mostra i quarti d’ombolo e straculo;
Un tibidoi³ de babe che va in ziro
Tastando fruti, pan, lardo e butiro,
De massere che strila, che tempesta,
E se sgrafa e se petena la cresta.

     Framezo a i picapiere in gran funzion
Per far la strada a schena de molton,
Scoazzeri che mena el sbrufaor
Lavandoghe le braghe a qualche sior,
Qua vedarè passar la filastroca
Dei militi che porta la pagnoca;
I civici pompieri in piena festa
Col speo sul fianco e la pignata in testa.

     Zo d'ogni banda capita una fola
De menuagia che vien via de scola;
De machinisti, fravi, marangoni,
Fachini, laoranti e de garzoni;

Tintori, pegoloti, calafai,
Boteri, farinoti e manoai;
Modiste, sartorele e sessolote⁴
Che porta i fiochi su le scarpe rote,

     Varè che confusion, che bissabova!
Tute le case par che le se mova
Drio sta furia de cari e de cavai,
De manzi e muli, d’aseni e castrai,
Che se sbanda, che bulega, che salta,
Se da drento da orbi e se rebalta,
Svola i cazzoti;⁵ canadindie, ombrele,
In fregole va su fina le stele,
I se ciapa, i se rondola per tera
Come la tigre e come la pantera.
Va sotosora tuta la contrada
Insina che non vien la peverada,⁶
Che a son de bote e co la renga fora
Li strassina tra i fischi in gatamora,
Intanto che se vede portar via:
Caco⁷ a San Giusto,⁸ Alcide in specieria,

---

Note

1. A Napoli.
2. Strepiti.
3. Rumore confuso.
4. Quelle che servono nei magazzeni.
5. Pugni.
6. Pattuglia.
7. Il centauro Caco venne ucciso da Ercole od Alcide.
8. Alla cappella dei morti.