La polenta
|
Edission original: |
Collezione delle migliori opere scritte in dialetto veneziano, Volume quinto: Ditirambi di diversi autori, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 5.djvu |
| Edission e fonte ▼ |
LA POLENTA
SCHERZO DITIRAMBICO
DELL'AUTORE STESSO
DEL VIN FRIULARO
Ben venuti, ben venuti,
Via, da bravi, le se senta,
Le se comoda qua tuti
Che xe ora de Polenta:
5Disnaremo qua in cusina;
Za le vede che zogielo!
Co mi go la Polentina
Questo è sempre el mio tinelo.
Ma, le prego, un momentin.
10Oe, Tonin, fala in fete
Sutilete,
E impenissi la licarda...
Varda, varda,
Che quel stizzo fa del fumo...
15Sì, per dia, che me consumo
A insegnarghe a ste marmote!...
Quele quagie no xe cote,
Quela bampa no laora...
La me 'l creda, Siora Dora,
20I me fa deventar mato!...
Parè via de qua sto gato,
Sul fogher no vogio intrighi;
Onzè ben quei becafighi;
Tirè zo quele briziole;
25Deme in qua le cazzariole...
Mo che odori che consola!
Portè in tola, portè in tola...
Cossa fastu? per pietà!...
Fame dir de le resie!
30Te l'ò dito, ti lo sa
Che no vogio scalcarie...
Tropa roba? cossa disele!
No le vede? semo in quindese:
E po gnente, mi soleto,
35Picoleto come son,
A contargliela da amigo,
Più d'un terzo la destrigo.
Co ghe xe sta bela zogia
Mi devento un parassito,
40E po mando el rosto, el frito,
E i piateli tuti al bogia.
La me piase dura e tenera,
In fersora e su la grela,
In pastizzo, in la paela,
45Coi sponzioli, coi fongheti,
Col porcel, coi oseleti,
Co le tenche, coi bisati,
Co le anguele per i gati,
Co le schile, coi marsioni,
50Coi so bravi cospetoni;
E po insoma in tuti i modi
La Polenta xe 'l mio godi.
Co camino per Venezia,
E che trovo per le strade
55Quei che vende Polentina
A un soldeto a la fetina,
Che i me diga pur: no cade,
Che mi spendo el mio boreto,
La gazeta, e infina el traro,
60E belbelo, belbeleto
Me la vago musegando,
Rosegando a boca sconta
Cussì calda, cussì onta
Soto l'ala del tabaro.
65Ola, digo, Comareta,
No tegnì la boca streta,
Fe i boconi un fià più grossi,
Che xa qua no ghe xe ossi;
Questo è late ben colà,
70Dove dentro go butà
El bisogno de farina
Tamisada fina, fina;
E po a forza di missiarla,
De menarla sora el fogo,
75Come fa ogni bravo cuogo,
L'ò tirada una rosada,
E a sculieri l'ò cavada;
Go butà po su el so zucaro,
El botiro e la canela:
80Comareta, via, magnèla.
Comareta, via, magnèla,
Che voi farve tondolina,
Grassa come un becafigo.
Perdonème se vel digo:
85Vu se' stada sempre bela;
Ma un pocheto magretina.
No vedè ste furlanote,
Che papote che le ga?...
Che montagne!... che arie fine!
90Quele è tute Polentine
Che al pajès le ga magnà.
Sto pastizzo xe un oracolo!
Che botiro perfetissimo!
Mo che otime tartufole!
95Che fongheti gentilissimi!
Che Polenta ben passada!
La par proprio una sfogiada.
Vegna i cuoghi con tutti i so sguatari
A imparar da sto muso de mamara
100A formar el pastizzo più nobile,
Cussì raro e gustoso che 'l simile
No i lo trova se i studia tre secoli,
Se la mente e 'l cervelo i se stempera;
No i lo trova, son certo, certissimo,
105Per dio baco! bacon! baconissimo!
Digo, Tonin,
No te voi là
Cussì impalà,
Cussì incantà,
110Via, sveltolin,
Dame del Vin...
De questo nò.
Oibò, oibò,
Voi del Friularo,
115Ma de quel bon,
Voi del mio caro
Vin del Stradon.
Mo, vardè quel dotoron
Che no fa che sprotonar,
120E gnancora el vol magnar;
Via, cavève, slimegoso,
Stomegoso,
Andè in camera a studiar;
Ma con tuto el vostro studio
125Sarè sempre un bel talpon...
Sì, fradelo,
Sì, credèlo, stè certissimo,
Senza i feri del mistier
Buta mal ogni laorier.
130La Polenta xe quel fero,
Quel bravissimo istrumento
Che la mente, che 'l talento
Fa che sempre diga el vero.
La xe un cibo lizierissimo,
135El più semplice, el più bon,
Che fa pronta digestion,
Che fa un chilo perfetissimo,
Da sto chilo, che xe un late
Che se mua po dopo in sangue,
140Nasse un sangue, un altro late,
Che portà po da le arterie
Al cervelo, e ai altri visseri,
El li rende in conclusion
Facilissimi,
145Valentissimi
A far tute le fonzion.
Ola, amigo, cossa feu?
Cossa diamberne gaveu
Che no fè che sbadagiar?...
150Povereto... se pol dar!
La Polenta ve fa sono?
La ve fa malinconia?
Andè in leto, caro nono,
Che la testa ve va via.
155Cossa mai saria de mi,
Che la magno a tutte l'ore?
Ma lo diga ste Signore
Se de note fazzo dì,
Se son sempre d'un umor...
160Cossa disela, Bonsior?...
La Polenta xe ordinaria?
Oe, lighèlo che 'l zavaria.
No la sa che le gran Dame
Par infin morte da fame
165Co le vede la Polenta?...
No la rida, la me senta:
Mi le vedo in palco a l'opera,
E a le cene dei Casini
A magnarla tanto in furia,
170Sia in pastizzo, o in boconcini,
Che par, e ghe lo zuro ben, persbrio;
Che no le veda mai graziadedio.
Ma no voi più batolar,
Vogio un poco respirar,
175Voi quietarme che son straco...
Maledetto sto macaco!
La Polenta inlanguidisse?
La fiachisse,
La sbasisse?
180Te becasse cento bisse!
No ti sa se i Terazzeri,
I Mureri,
I Fachini,
I Tasini,
185Quei che dopera le sieghe;
Quei che conza le careghe,
Quei che ciga tagialèi
Co i xe vechi i par putei?
I xe svelti come spade,
190I camina per le strade
Che i consola chi li vede,
E sì, posso dirte in fede,
De Polenta schieta e neta
Sti Signori se dileta.
195Ma 'l Friularo xe fenio.
Porta, porta, caro fio;
Vegna, vegna fiaschi a furia,
E ogni fiasco strapienissimo,
Che za qua no gh'è penuria
200De sto Vin prelibatissimo.
Oh, cospeto, che miracoli!
Mo che caro Sior Chechin!
No la sa se ghe l'ò dito?
Se no falo l'ò anca scrito,
205Che son mato per sto Vin...
Varda roba! varda! varda!
La mostarda?
Mo che quagie! mo che tordi!
Mo che odor! lo sente i sordi:
210Che Polenta! co ben frita!
La me dà proprio la vita.
Via, Comare, destrighemola,
Che, per diana, la lo merita...
Ah! gavè dolor de denti?
215Malegnazi! i xe sti venti,
Fredo e caldo che se chiapa;
Ma son qua co un bel remedio...
Quelo sì, che se la slapa!
Recordève anca de nu...
220Sì, Comare, son da vu...
Son qua subito... cospeto!
Se i ve dol fichève in leto,
E mandè a chiamar el medico...
Varda, vè, se la va in colera...
225No me provo più a burlarla,
Ghe ne magno un'altra feta,
Ghe ne sugo una bozzeta,
E po vegno a consolarla...
Via, son qua, la se tasenta,
230Sì, Signora, la Polenta,
La Polenta xe 'l segondo
Valentissimo rimedio
Che destruze, che destermina
Ogni mal, benchè profondo.
235Che 'l sia interno,
Che 'l sia esterno.
Che 'l sia acuto, che 'l sia cronico;
Che l'umor sia malinconico,
Sia bilioso,
240Sanguinoso,
Pituitoso,
Scrofoloso...
Stradeladediavoloso,
La Polenta,
245La Polenta,
Sì, Signora, la Polenta
Xe un rimedio che 'l più raro
No ghe xe dopo el Friularo.
Se ve dol i denti in boca
250Una feta apena cota
Aplichèla
Cussì calda a la massela;
Fe l'istesso in qualche dogia
Che ve dà un dolor da bogia,
255Sia pleuritica, o sciatica,
E ve parlo ben per pratica.
Se per caso studiè l'etica,
No stè a tor brodi de vipera,
De gagiandra, nè de gambaro,
260Nè tanti altri diavolezzi
Che destruze vita e bezzi.
A bon'ora ogni matina
Feve far la Polentina,
E magnèla a scota deo,
265Se crepè me tagio un deo:
Se gavè... ma cossa è sta?...
Gran secae! che i vegna qua...
Oh! cospeto! benedeta!
Sì, dasseno una casseta
270De Farina bergamasca
Che me arriva da Somasca.
Digo ben che la go cara...
Oe, vardè che cossa rara!
Che color! che bel zalon!
275Me vien fina tentazion...
Cossa distu, panza mia?...
Ah, no, no; metèla via,
La faremo un altro dì...
Mo 'l gran omo che son mi!
280No me tegno, no gh'è caso,
La go sempre soto el naso...
Eh! tornèmela a portar...
Anca ti ti vol parlar?...
Tropo tardi?... varda, mato!
285Fazzo farla qua in t'un trato.
Catina, via, Catina,
Tamisa in quel albuol
Sta bela zalolina;
Ma varda che 'l granziol
290No resta in tela semola
Che 'l vaga tuto zo...
Puro fioreto? oibò,
La riesse tropo slimega,
E smorta de color.
295Ma cossa fa quel sior
Là solo in quel canton?...
To zo quel caldieron,
Tachilo a la caena.
Mo via, gran Madalena,
300Va là daghe una man...
Oe, zoghistu col can?
Mo caro sto putin!...
Destrighite, sassin!
Fa fogo che la bogia...
305Cavève, cara zogia,
No me vegnì in t'i pì...
Ma, digo, pofardì!
Quel'aqua va per sora...
Xe ora, sì, xe ora,
310Xe ora, sì, cocal!
Parechieme del sal...
Destrighite, Catina.
Vien qua co la farina...
Basta: va ben cussì...
315Va ben, te'l digo mi,
Co la xe tropo dura
La buta ruspia e scura;
E piena de monari...
Alegri, fioli cari,
320No stemo qua a vardarla,
Xe ora de menarla.
Via, presto, femene,
In qua la mescola...
Da bravo, Giacomo,
325Da bravo, daghela,
Da bravo, petighe
De cuor, de vissere;
Da bravo, menila
Con tuta l'anema...
330Adasio, adasio,
Che la se brustola!
Presto, destachila,
E ben unissela
Co la to spatola
335Qua su la cenere...
La va benissimo;
Via, presto, deghime
Un fià de fogo,
E rebaltemola...
340Mo bravo, cuogo!
Largo, largo, deghe strada
A sta nobile matrona
Che da tuti xe adorada,
A sta bela Polentona
345Schietaneta e natural,
De farina, de aqua e sal;
Senza ontume,
Nè grassume,
Senza odor da brustolin;
350Senza un fià de pignatin,
Nome fata e rebaltada:
Largo, largo, deghe strada.
Oe, Catina, sona el cimbano,
E ti, Giacomo, compagnila
355Co la mescola e la spatola,
Za ti sa sonar le gnacare,
Che ghe femo onor al merito
Veramente imparegiabile
De sta nobile regina
360D'ogni piato de cusina.
Qua del filo, siora Bortola,
Che voi farla tuta in fete:
Mi per mi ghe ne voi sete,
Oto, diese, e po... chi sa?
365Fermi un poco, cari vu,
Che ghe vogio pensar su...
Fermi, digo, pofarsbrio!
Lassè star de pizzegarla,
Che ò pensà de maridarla.
370Ma chi mai sarà el so sposo?
Via, regazze indovinèlo...
No dasseno el xe più belo...
Mile volte più grazioso...
No'l trovè gnanca in cent'ani;
375Ma ve levo da sti afani:
“Lu xe'l re de tuti i Vini,
Dei Liquori soprafini.”
Oe, digo, Giacomo,
To quela piadena,
380Presto, impenissila
De sutilissime
Fetine, e fregole
De sta belissima
Polenta vergine,
385E po maridela
Co un bocalon,
Del mio carissimo,
Prelibatissimo
Vin del Stradon.
390Su, via, puti, alegramente,
Che cantèmo unitamente:
Viva Bergamo e Bagnoli
Che produse un per de fioli
Che xe un per de rarità.
395Che Polenta! mo che Vin!
Che topazzo? che rubin?
De più belo no se dà,
De più belo no se dà.
Cospetazzo del demonio!
400Che stupendo matrimonio!
Mo che sopa xe mai questa
Fata su cussì a la presta?
Ah! se BACO, quel bravon,
Quel potente tracanon
405Che à destruto tuto el Vin
Del famoso canevin
Del Granduca de Toscana,
Fusse qua co la so ARIANA,
E col resto del so seguito,
410Son seguro, segurissimo,
Che'l dirave pien de giubilo:
Bravo, bravo, bravo, zovene!
Va pur là che ti ga el merito
D'esser stà ti el primo e l'unico
415Inventor fortunatissimo
De sta amabile sopeta
Che consola, che dileta.
Catineta,
Comareta,
420Riosa, Bortola, Lucieta,
Via, sorele, tute qua
A sentir sta rarità...
Cussì poca, coresin?
No lateu quel fantolin?
425Impenive ben la panza:
No gh'è gnente, assicurevelo,
Gnente al mondo che la supera
Per far late in abondanza.
Ola, digo, bela fia,
430Me se' mollo ingritolia!
De novembre gavè fredo?...
Oh ve vedo, sì, ve vedo!
Ma no tremo minga mi:
Via, careta, fè cussì.
435Vegna pur tuti i aquiloni,
Le più fiere levantere,
Vegna el fredo dei Laponi,
Co go in panza sto bruetin
Mi devento un paladin,
440Mai no tremo, supio e suo,
Se fusse anca quasi nuo.
Se sta sopa mai va avanti,
E se meta tuti quanti
A magnarla come i risi,
445Nu vedemo tuti sbrisi
I Sartori, i Pelizzeri,
Rovinai tuti i Marzeri,
No se fabrica più pani
Nè da Schio, nè Padoani,
450Mai più bati, nè londrine,
Nè fanèle, nè schiavine;
Vien i fassi a vinti al traro,
Le manizze va in t'i gatoli,
No se mete zo le ventole
455Gnanca el mese de Genaro.
Toni, porta del Friularo;
Che la Sposa xe qua sola,
Presto, via, che la consola;
Co la xe cussì soleta
460La xe morta, povereta...
Pofardin de din, de dia!
La gran testa xe la mia!
Sì, per crispo, che son mato!
Cossa diamberne goi fato
465A no darghe a sta Sposina,
A sta bela Polentina
Anca un poco de servente
Che ghe staga sempre arente?
No gh'è Dama, nè Contessa,
470Citadina, o Marcantessa,
Benestante, o Boteghiera,
In ancuo la Camariera,
La Massera,
La Calera,
475Fin la sposa del scoazzer
Ga'l so bravo cavalier.
E sta nobile Regina
D'ogni piato de cusina
Starà sola a muso suto?...
480No la tegno, nò, da puto.
Son qua mi,
Son qua mi,
Uì, Madam, Madam, uì,
Sarò el vostro cavalier
485Pien de stima e de dover;
Cavalier minga de queli
Che vol far con tute i beli,
Che sospira, che delira,
Che per tute mor e spasema,
490E i le ga po tute in cesto
Co i ga bu quel che i à volesto.
No, no, no,
No, no, no,
Sempre quelo mi sarò,
495E per ti, e per to Mario;
Sì, ben mio, te parlo schieto;
Anca lu xe'l mio dileto.
Cussì el mondo vederà
Che xe vero che se dà
500In amor la bela fiama
Che platonica se chiama...
Eh, cavève, maledetti!
Che bochini da zaleti!...
No permeto gnente afato...
505Sì, son mato!
Oh! fradei, no ghe xe caso,
Qua nissun ghe mete el naso,
Sta sopeta è tuta mia...
No, no vogio gnanca femene,
510Che le vaga tute al diamberne,
No voi darghe zelosia.
Vien qua, cara, vien da mi,
Che ti è ti,
Ti soleta
515La mia bela gnognoleta,
Sì, mio cuor,
Ti xe l'unico mio amor;
Vienme in sen,
Vienme in sen
520Che te vogio tanto ben...
Mo che union! mo che sopa adorabile!
Che elisir xe mai questo! che balsamo!
Mo che ambrosia celeste! che netare!
Mo che gusto stupendonazzissimo!
525Mo che gusto xe quel che lo supera?
Mi per mi no lo trovo certissimo,
Mo che gusto stupendonazzissimo!
Mo perchè no songio Dedalo,
Che voria svolar in bota
530Co una bela piadenota
De sta sopa sul Parnaso?
Ah! sì, sì, son persuaso,
Che se Apolo la gustasse,
E del so potente spirito
535Molto ben el se invasasse,
El dirave: adio, Castalia,
Dopo tanti e tanti secoli
Te abandono, e vago là
Dove gh'è sta rarità.
540No'l sarave un gusto nobile
A veder la cusineta
De sta picola caseta
El gran Pindo deventada?
Vegnerave a piena strada
545I poeti da ogni logo
A infiamarse de sto fogo;
Quei fornei sarave el monte,
E sta piadena el bel fonte;
El cavalo?... la mia gata,
550E l'orchestra? la burata;
E quel bon Cantor Divin
Co le Muse in compagnia
Cantarìa,
Sonarìa soto el camin.
555Vardè! vardè! vardè!
Che bel color che go,
E megio lo farò,
E megio lo farò.
Me sento, sì, me sento
560In fior de zoventù:
Se me volè contento
Dè qua che struca su.
Mo, cara, mo bela!
Mo bela, mo cara!
565Mo bona!... mo rara!...
Mo rara!... mo bona!
Ti xe stupendona!
Ti se sempre quela.
Mo cara, mo bela!
570Mo cara, mo bela!...
Tasi là, che ti è un cocal!
Sta sopeta me fa mal
Perchè stago in alegria?
Uh, che testa descusìa!
575Porta, porta, in to malora!...
Porta ancora, porta ancora,
No te far cussì pregar,
Che te pustu inamorar!...
Mo bravon! mo bravo assae!
580Bravo assae!
Bravo assae!
Voi sorbirla in do strucae...
No, ti disi?... no, perchè?
Varda, ve...
585Varda, ve...
Varda, varda, caro ti...
Songio mi, o no songio mi?...
Saldi, saldi, che m'ingosso!
No la po...
590No la po...
No la posso mandar zo...
Ti l'à fata molto dura!
Pofardia! gastu paura
Che ghe trova tropo gusto?...
595Destrighemose, bel fusto,
Svoda qua quel bocalon...
Oh! cussì la va benon!
Ma benon! benon! benon!
Ah! fradeli diletissimi,
600Che sposini! molto fervidi!
Se sentissi in t'el mio stomego
Che carezze che i se fa!
Mo che salti! mo che tombole!
Che urtoncini che i me dà!
605Sì, careti, sì, godevela...
El gran gusto che go mi!
Ah magari seguitasseli
Zorno e note a far cussì.
Madamina
610Carina,
Belina,
Via che balèmo,
Via che saltèmo,
Che se godèmo fin domatina.
615Puti, sonè,
So... so... sonè,
Che canto mi,
Mi, mi, mi, mi.
E nio, e nio, e nio,
620S'à maridà Matio,
E nio... e nio... e na...
E... na...
E... na...
Alto là,
625Alto là,
Alto, digo, pofardia!
Che la testa me va via
Co sti soni
Dei cordoni...
630Vardè qua...
Vardè qua...
Son in tera destirà!
Deme man, toleme su...
Su, su, su...
635Su, su, su...
Mo co storno... mo co fiaco!...
No capisso, per dio baco!
No me posso sostentar...
Eh tornème a colegar,
640E andè tuti via de qua.
Che sarà quel che sarà.