No stéme dir poeta
|
Edission original: |
Il dialetto e la lingua, Antologia vernacola, a cura de Vittorio Fontana, Verona, M. Bettinelli, 1924 |
|
Fonte: |
| ← Sora 'na putina che va a la zerca | Edission e fonte ▼ | Le Arche Scaligere → |
No stéme dir poeta
Par carità, no steme dir poeta
che me vargogno, fioi, devento rosso...
sì, g’ò ’na vena un pochetin discreta
che fa, nè dise gnente po’ de grosso.
’Na rima dove parla mal la Beta,
un verso dove brontola Pigosso,
una quartina dove la Marieta
la siga che i ghe búsara un scartosso.
E dopo.... putelete e puteleti
che i core, i salta, e dopo i se minciona
tarocando, compagno dei galeti.
Sì, proprio l’è ’na roba poco bona,
che no merito, amissi benedeti,
el nome de poeta e.... la corona.
Bruno da Legnago