Santa Lussia
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← El sogno del cavel bianco | Edission e fonte ▼ | Un disnar in çità → |
I l'à fati su de note,
co le asse e col martel,
co le tôle mése rote
piturade da cortel,
co 'na tenda trata sora
co i lumeti trati là...
L'è così che salta fora
i bancheti de la Bra!2
Là, gh'è paste, là, gh'è fiori,
gh'è i zugatoli da un franco
(i zugatoli da siori)
ma ghi n'è che costa manco;
ghi n'è fin che costa un besso,
e ghi n'è che de val tri...
«Con parmesso, con parmesso,
che vôi vedarli anca mi.»
Le puete bele bianche,
le se buta fora in strada;
un caval da do palanche
l'è drio a trarme una peada...3
Sto tranvai co i so vagoni
par che el fassa: fu, fu, fu!...
«Bei maroni, bei maroni,
de comandelo, anca lu?»
Giovanin, l'è meso mato
par sta bela carossina;
«Mandolato! Mandolato
tuto màndole e farina...»
Quanta gente! Che boresso,
drio a 'na tromba che fa piiiii....
«Con parmesso, con parmesso,
che vôi védarla anca mi».
– Me morosa picinina
de girar no l'è mai straca;
se la cata una vetrina,
l'è 'na pègola che taca;
la roversa fin i oci,
la me sburta e, signor sì,
se badasse a i so zenoci,
cossa mai saria de mi!
– Me morosa piassè granda,
la rasona e la me scolta,
mai da mi no la se sbanda,
l'è un piaser condurla in volta....
La me dise in te una recia:
«No sta spendar, l'è pecà!»
Me morosa piassè vecia,
l'è la prima de la Bra!4
- Note