Ventiquattro Odi Scelte di Orazio Flacco/07

by Pietro Bussolin

ODE XII. LIBRO IV. EPODO II.

ODE XII. LIBRO II.

Pietro Bussolin

Ventiquattro Odi Scelte di Orazio Flacco
tradotte liberamente in verso e dialetto veneziano

ODE XII. LIBRO IV.

1832

Edission original:	Bartolommeo Gamba, Serie degli scritti impressi in dialetto veneziano, compilata ed illustrata da Bartolommeo Gamba, giuntevi alcune odi di Orazio tradotte da Pietro Bussolin, Venezia, dalla tipografia di Alvisopoli, 1832
Fonte:	Indice:Serie degli scritti impressi in dialetto veneziano.djvu

←  EPODO II.

Edission e fonte ▼

ODE XII. LIBRO II.  →

Ode XII. Libro IV.

Jam Veris comites, quae mare temperant
Impellunt animae linthea Thraciae.

Orazio invida el so' caro amigo Vergilio a bever un goto del famoso vin de Calvi, a condizion ch'el porta anca lù un vasèto de balsamo de nardo ecc.

La primavèra xè capitada
     Co i ventesèli, co i zefireti
     Che i bastimenti spenze via drèti,
     4E più tranquilo fà star el mar;
Tute xè nète le pradarìe
     Da quele bròze che le giazzàva,
     Nè i fiumi rùza come i ruzàva
     8Per la gran neve, che no ghè più.

Progne infelice, la poverèta!¹
     Che pianze e cerca sempre so' fio,
     Xè quà tornàda per farse el nïo
     12Dove, zà ogni anno, la se lo fà;
(Progne, sì fàta vergogna eterna
     De la famègia de i re d'Atene,
     Che giustamente pianze, e stà in pene
     16Per quel delito mal vendicà)
E i pastorèli sentài su l'erba
     Co le so' cavre, co le agnelète,
     Sonando el flàuto, canta le ariète
     20Al dio de i boschi so' protetor.
La stagion calda vien via de tròto,
     Che fa che siemo sempre arzirài;
     Ma chi prevede, scansa sti guai
     24Col bever, spesso, del mègio vin;
Donca, Vergilio, s'el vin te piase,
     E quel de Calvi te dà più gusto,²

     Làssa che i fiastri del nostro Augusto³
     28Stàga un pochèto senza de tì;
Ma vògio a scambio de sto vin raro,
     (Che da Sulpìzio repòssa quièto)⁴
     De quel to' nardo; ma del perfèto;⁵
     32Còssa preziosa! secondo mì.
Se te dà gusto ste bacarète,
     Vien, che te aspèto; ma col vasèto;
     Perchè, altrimenti, col fazzolèto
     36Quela to' bòca ti pol forbir.
Se beve a màca là in quele case
     Dove ghè sempre corte bandïa;
     Ma una bicòca, co fa la mïa,
     40Cussì, per gnente no la dà vin;
Fà donca presto, làssa ogni intrìgo,
     La to' varìzia càzzela via,
     E stemo un poco quà in alegrìa,
     44Che zà pur tròpo! s'à da crepar;
Sò che permesso xè qualche volta
     Al serio el bùfo missiarghe drento,
     E ch'esser màti qualche momento,
     48Tutti lo dise, ch'el xè un piacer.

---

Note a cura de l'autor

1. Progne e Filomèna giera do sorele fie de Pandion re de Atene. La prima, s'à maridà co' Tereo re de la Tracia; la seconda xè restada da maridar. Tereo invaghìo de Filomèna (forse per forza) el la gà violàda. Savesto el fato da Progne, per trato de rabia e vendeta mal consegiada, la gà mazzà so' fio Iti, e la ghe l'à dà da magnar a so' mario. Sto corbàto de deliti, a eterno scorno de quele famegie reali, xè stà punio da le divinità celesti, e per castigo Progne xè stada trasformada in rondinèla; Iti, in fazan; Filomèna in rossignol; e Tereo, in upupa, osèlo che gà una cresta rossa, che se nutrìsse de cosse sporche, e che se vede in lioghi umidi, bassi, e in t'i campi santi.
2. Cità del regno de Napoli famosa per el so' vin.
3. Druso e Claudio giera i do' fiastri de Augusto, dove che andava, squasi ogni zorno, Vergilio.
4. Galba Sulpizio possedeva gran caneve de preziosissimi vini, fra i quali el vin de Calvi.
5. Col nardo, erba odorosissima, pestà strucà, ecc. ecc. se faceva una specie d'essenza che mandava odor el più soave. Se lo faceva in do' maniere. La più costosa giera quela a uso de Atene, e questo sarà stà quelo probabilmente che gaveva Vergilio, e che ghe piaseva al nostro Orazio.