I mostri
|
Edission original: |
Il dialetto e la lingua, Antologia vernacola, a cura de Vittorio Fontana, Verona, M. Bettinelli, 1924 |
|
Fonte: |
| ← Ritorno dagli esami | Edission e fonte ▼ | La madonina blù → |
Quando, a l’istà, gh’è i salti ne l’Arena
te cati lì soto a la luce bianca
tuto un roveio de anime in pena,
che vien a dimandar mesa palanca;
l’è ’na sambra che urta e se remena,
e va de gata-gnao, e gira, e sfianca,
e riesse, nel gropo de la piena
se i vigili no i gh’è, col farla franca.
L’è ’na sambra che a furia de sburtoni
cala zò a salti sul scalin più basso,
e cenosse de nome tuti i tony,
e guarda in sù le gambe de ’na dona
e va in estasi ai salti de ’n paiasso;
c'ela 'sta sambra? I mostri de Verona!
I mostri de Verona i è la rassa
più remenga e canaia che ghe sia,
ogni strada ogni vicolo ogni piassa
de buta fora mesa compagnia,
e i g’à tuti quel’aria de bardassa
quele ociade impastà de furberia
dove i pensieri, nassa quel che nassa,
no g’à mai ombre de malinconia.
Sensa bareta, con el ciufo al Vento,
musi roti che gnente li impressiona,
ciàpandose a cazzoti ogni momento
col sangue che ghe boie in gioventù,
fioi de la strada, i mostri de Verona
i è ramenghi e canaie che mai più.
Fioi de la strada, come i passaroti
se destaca dal nìo ’pena che i vola,
così lori, magari coi ciuccioti
in boca, da le còtole i se mola:
e i vien sù come i vien; da piassaroti,
parchè so mare, grassa che la cola,
se qualche giorno a furia de cassoti
la se ricorda de mandarli a scola;
parchè so pare è sempre a l’oficina
e a la festa ghe piase star in fraia
e far la bala; e lori?... A la matina
no i à gnanca fenido de sceiarse
che i è zà in strada co la so smarmaia
scalsi, despetenà, senza lavarse.
Lavarse? Mai. Ma pur sora quei musi
che g’à la rufa de ’na setimana
drento da le camise tute busi
che spenta come pèsse 'da 'n'altana
te i vedi forti, driti come fusi,
col so alegro odor de zente sana
che i mostra i gòmbi dai vestiti usi
più svelti de un batocio de campana.
E gh’è i più picenini, tondi grossi
col museto da tera o da carbon
che a vèdarli così coi labri rossi
sporchi, ma bei, te faria vola quasi
de pocciarli in t'un brento de saon
e pò sugarli tì con i to basi.
Ma po’ i vien grandi: e alora no se sa
che remenghi che i sia ne le so imprese;
for da le porte quando vien l’istà
par Campagnola in çerca de sirese,
a zonzo, tuto el dì, de qua de là,
zugando a carte a l’ombra de le ciese
o atorno a un muro 'pena piturà
a scrivar col carboni «B.... ci lese»!
a far le smorfie drio de i forestieri
o in meso ai taolini del cafè
cercando ciche in barba ai camarieri,
opur de sera quando ti te magni
tacarse ai campanei, quanti ghe n’è,
e pò via... co le ale nei calcagni.
A dodesani i pensa a la morosa:
i g’à i labri da late, ma a la festa
dopo dotrina, i fila drio 'na tosa
che g’à fato girar un fià la testa:
meso toscan, 'na foia d’erba rosa,
la bagolina, e avanti su la pesta
sperando che la varda, co ’na posa
da galeti novei che fa la gresta.
Taca le prime fiame, el regaleto,
la malissia par darghe un pissegon
o un baso ne l’ombrìa de un vicoleto,
taca le gelosie, taca i duei
coi altri mostri in riva al muraglion
a peade e tironi de cavei.
Le so morose i è le putelete
che te vedi a San Zen e a la Carèga
piànzar soto a le sberle maledete
par i punti robà zugando a pèga:
negre de pele come carbonete
coi sgrèndeni sul col che se rampega
con de i oci che slinsa via saete
e ’na vosse ch’el par che le se sbrega,
lore g’à sempre ’na savata in man
e un’insolensa pronta su la boca;
ancò sporche, remenghe: ma diman
rissi al vento, oci grandi, péto in fora,
le sarà le modele de Dal’Oca
fresche, superbe, da morirghe sora!
E così, soto el sol de 'sta Verona,
drento ne l’aria fina e maturlana
ch’el Montebaldo rustego ne dona
i mostri passa come un’onda sana
de zoventù simpatica e ciassona;
un’onda fresca e viva de fontana
che in facia de la zente brontolona
spiansa, spiuma, e ridendo se spampàna;
e ne le strade, ne le nostre piasse
dove qualche rabioso el tira va
dandoghe dei remènghi o dei bardasse
i mostri che te sburta de cariera
i è la nota de sol, i è l’alegria,
i è i rondoni che porta primavera....
Fragiocondo
I mòstri: sono gli scapigliati ed arguti monelli veronesi; fratelli degli scugnizzi napoletani o dei muli triestini: il fiore della generazione troppo libera che nasce sulla strada, e che purtroppo, — se non custodita — finisce nella galera. Alla rieducazione dei mòstri dela strada pensa, con provvido senso di gentilezza e pietà il patronato dei Minorenni Corrigendi che nel nome augusto di Cesare Lombroso saprà dare ad essi una Casa di Custodia e di Lavoro, in Verona.
Fragiocondo: poeta che... non ha mai pubblicato volumi di versi: giornalista che vede il mondo attraverso le allegre pagine del Can da la Scala: dottore in legge ma.... senza cattive intenzioni: al secolo Giulio Cesare Zenari.
i sàlti ne l'Arena: l'Anfiteatro romano accoglie, specie nell’estate, circhi equestri che formano la delizia maggiore dei mòstri specie attraverso capriole dei clowns. — sàmbra: ciurma; quì usato nel senso di ondata. — aria de bardassa: la spavalderia ironica dei monelli — musi roti, faccie toste e sbarazzine. — ciapàndose a cassoti: prendendosi a scappellotti — piassaroti: figli della piazza. — star in fraia: gozzovigliare. — co la so smarmaia: con il consueto gruppo sfaccendato di coetanei. — mostra i gòmbi: lasciano vedere gomiti e braccia dagli strappi della camicia. — pòcciarli: risciaquarli in una tinozza d acqua. — co le ale nei calcagni: con le ali ai piedi. — a peade e tironi de cavei: i caratteristici duelli dei mostri sul grèto dell'Adige, a base di calci e di boxe. Sport molto più sano che non le sèste nelle buie sale dei cinematografi davanti alle oscene pellicole passionali, od ai romanzeschi intrecci alla Nik Carter, o Nat Pinkerton. — zugando a pèga: gioco delle ragazzine che consiste nel far scivolare col piede, equilibrandosi sopra una gamba sola, un sasso od una paglia, entro una scacchiera segnata a carbone sui marciapiedi. — slìnsa via saete: le occhiate assassine che già mandano scintille; annunziatrici dei futuri inciendi.