L'ultima barufa
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← La serva disonorada | Edission e fonte ▼ | La cuna → |
– Ghèto voia de darme? Dâme! Ghèto
voia de dirme quel che te vien su?
Urla! Pèrdeme pura de rispeto,
ma no sta dir che no te piaso più!
Che j è du ani che spartisso1 el leto
da quela note che t'ò conossù,
e de là ghè to fiol, che 'l dorme chieto,
e no 'l t'ha fato propio gnente, lu!
E gnanca mi no t'ho mai fato gnente,
ma son stada obediente al to comando,
fora dal mondo, fora da la gente...
Son scapă via par ti da casa mia,
lavorando, piansendo, sospirando,
par no farte patir la gelosia! –
― Sì lo so, l'è el Signor che me castiga,
lo so, lo so, lo so, bison2 che tasa...
Ma te si sta do note for de casa
sensa gnanca3 mai scrivarme 'na riga!
E mi quà sola, su to fiol che siga,
che bison che lo lata e che lo basa,
sensa un gosso4 de vin, sensa 'na brasa,5
lavorando par lu... Con che fadiga!
Ma par cosa me tràtito così?!
Ma ci èlo sto can? quel che te 'stiga,
quel che te dise tanto mal de mi?
Èlo questo el compenso, questo el fruto...
Senti... Vien quà, che no te magno miga...
Scolta... Vien quà, che te pardono tuto...
– No te 'scolti?... Te tasi?... E te me ridi!
Te scurlo6 e te stè lì come de sasso?
Te me fè quele sgogne7 da paiasso,
e te squassi8 la gamba, e te me sfidi?!
Ah! I me l'ha dito, che te te maridi...
Te vô farte più sior, farte più grasso...
Te vô condurla la to dona a spasso,
parchè a 'ndarghe con mi no te te fidi!...
Ma parchè, par to fiol no gh'è giustissia,
no gh'è 'na lege che te tien ligado:
fora bastardi... Zà le donne sbrissia,9
bruto viliaco porco, svergognado...
Senti... Vàrdelo là che 'l se desmissia...
Va su la forca; te me l'è sveiado...
- Note