La serva disonorada
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Libro VI - Le tre cune | Edission e fonte ▼ | L'ultima barufa → |
Nata in campagna, fresca e paciotèla1
oci celesti e un bel facin da mato,
sempre la prima a far la ladronçela
de fruti verdi,2 in brol3 del so curato;
dona zà a quindes'ani, vita snela,
ciacola4 pronta al par de un avocato;
persa de note a contemplar 'na stela,
come la fusse stada el so ritrato...
Un de dopo disnar che l'era festa,
tra due paneti e un goto de conserva,
imbriagada dai discorsi grandi
de una parona debole de testa,
la s'ha convinto de andar far la serva:
«Margarita Beneti ai suoi comandi!»
Quante case, Gesù! Madona, quanti
alti palassi e campanili e tore!
Este carosse e sti tranvai, che core
sensa bestie che tira par davanti!
Che bele ciese, che cafè galanti,
che vetrine, che abiti, che siore!
Ma in sta çità me digo no se more,
ma zò in çità se danarìa anca i santi...
― Psss! – Psss...!
– Cossa g'alo?
– Ocioni bei,
la se ferma un momento, la se ferma,
che mi par ela, perdarìa i çervei...
Adio casa, adio sono, adio laorar...
La se insognava tuta una caserma
che fasea le manovre sul solar...5
Una parola ancò,6 'na cartolina
ilustrata coi fiori e i amorini,
doman 'na carta de confeti fini,
più che se pol, ciamarla: signorina!
Aspetarla da messa e da dotrina,
compagnarla a la musica, a i giardini,
farghe sperar tra un fogo de slusini,7
un bel abito bianco de sposina...
Poco ghe vol par rovinar 'na pora8
serva: la camareta su le scale,
soli, de note, a quela data ora...
Sluse du oci cativi, quei del falco,
la çiveta la bate un fià le ale,
ride el diavolo al scuro e casca el palco!
El giorno dopo, ne la so inocensa,
la serveta la parla de sentirse
portada de andar monega9 e vestirse
col santo velo de la penitensa...
Quel'altro ghe sta a drio con gran prudensa,
che no l'è quelo el caso de pentirse,
che in carneval bisogna divertirse,
po' el la pianta de colpo e 'l va in licensa.
Se ghe ingrossa la vita, ghe se impissa10
drento a i oci col çercolo, una fiama
de febre, un inquietudine, 'na stissa;
e più scade vissin quel bruto giorno,
che Dio ghe fa, che la deventa mama,
più el diavolo la tenta e 'l ghe sta intorno!
Semo in Corte d'Assise – Presidente:
– Margarita, vien quà, cònteme adesso
parchè in strada da ti, dise la gente
che t'è successo... quel che t'è successo?
C'elo stado sto sior che t'ha impromesso
e mari e monti par vegnerte arente?11
– El nome no lo so, sior presidente...
– Mi ghe voleva tanto ben l'istesso...!
Testimoni (Vien drento la parona)
– Giusto ela, com'ela sta fassenda?
– Mi?... La putela la m'ha parso bona,
ma le serve, lu el sa, che dài e dài,
par pulito, ma assè che se ghe tenda,
le rompe tuto e no le parla mai!
«Pubblico Ministero... Io vi domando
la condanna di questa... peccatrice
che avendo messo al mondo un infelice,
lo ha fatto scomparir di contrabbando...
Difesa... Ma di questo atto nefando,
l'istruttoria, l'autore non lo dice;
se brutto il quadro, peggio è la cornice,
una cornice che vi andrò illustrando...
Fu scoperto il delitto, in certo posto
che ricordarlo non mi par decente,
ma il colpevole vero si è nascosto...
Un farabutto della bassa scala,
che con cinico volto indifferente,
sta spiando la vittima, quì, in sala!»
Grandi applausi nel pubblico che scolta...
L'avocato riceve i complimenti,
la serveta la perde i sentimenti,
e i giurati vien drento uno a la volta...
– Margarita, i giurati ve g'ha assolta,
(parchè stanote i vol dormir... contenti),
ma guardè de tegnerve su l'atenti,
che no femo de pezo 'n'altra volta.
La serveta la scapa al so paese,
i soi12 ghe core incontro co la banda,13
e una coleta pensa par le spese:
pò un vedovo, de quei de boca bona,
con case e campi in sposa la dimanda...
More la serva e nasse la parona!
- Note