I morti/Atto primo

by Riccardo Selvatico

Atto primo ../Personaggi

../Atto secondo

Riccardo Selvatico

I morti

Atto primo

XX secolo

Edission original:	Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910
Fonte:	Indice:Selvatico - Commedie e Poesie Veneziane, Milano, Treves, 1910.pdf

← Personaggi

Edission e fonte ▼

Atto secondo  →

ATTO PRIMO.

Camera in casa di Daniele.

SCENA I.

Giovanna, Teresa.

Giov. Avanti, avanti siora Teresa! Ma varda che bela improvisata!

Ter. Gera tanto tempo, sala, che me brusava de vegnir, fin che ancuo go dito: casca el mondo, ma vogio proprio andar a darghe un baso.

Giov. Ma sì benedeta! lo sò, sì, che ela me vol ben. La se senta qua...; come stala?

Ter. Cussì...

Giov. Me dispiase che la me trova in sti stati... ma zà co' ela no ghe bado; no xe vero? Xe tuta sta matina che cerco de meter un poco in ordine sta camara, giusto per l'Adele. — No! no la varda, che me vergogno...

Ter. Me par che sia dapertuto un specio...

Giov. Cossa vorla? Xe do mesi che no go più testa per gnente! L'Adele de le volte la me tol via... Ela mama, la me dise, par che la gabia da far da magnar sui terazzi!... Ciò... sarò anca un pochetin sutila, ma ghe digo la verità... che i me diga de tuto, ma un fià de caseta in ordine la me piase. Ghe xe mio mario che una volta no 'l ghe badava — la sa come che xe i omeni — ma adesso lo go tanto abituà, che co 'l vien dentro no ghe xe pericolo che no 'l se neta i stivai fora de la porta. Ciò... la sarà una debolezza, ma un fià de pulizia la stà ben.

Ter. La ga razon.... E cussì la me conta... l’Adele xe levada?

Giov. Sì, ringraziando Dio, ancùo la se levarà per la prima volta.

Ter. Figurarse Daniel come ch’el sarà contento!

Giov. Mi digo che ancùo ghe s-ciopa el cuor da la consolazion! Un momento fa, el gera de là ch’el se desfava la barba, e el cantuzzava come un fio!

Ter. Povaro Daniel, el gera malandà in salute. Averlo visto come lo go visto mi in quei giorni, ghe digo ch’el faseva paura! Mi ghe lo diseva sempre a l'Ema: pregar Dio che no nassa una disgrazia.. perchè se dovesse morirghe quela so fia, guai!

Giov. Benedeta! Se trata che no 'l gera più lu... no 'l saveva gnanca quel ch’el se fasesse! Lu gera ridoto che no ’1 magnava più; no 'l dormiva più... lu co'l tornava a casa, no ’l faseva altro che serarse ne la so camera e dir orazion come un fio! Basta che ghe diga, che dopo tanti ani che se pol dir no l’andava gnanca a messa — perchè la sà che i omeni xe un poco slàpari... — ben, una matina me lo vedo levar suso in albis... e indove andavelo?... A confessarse e a far la comunion!

Ter. Da resto la senta siora Giovana — adesso che la xe passada, se pol dirlo: la xe stada una bela batosta; e se quel’anima la xe tornada indrio, se pol proprio dir ch'el sia stà un miracolo!

Giov. Ciò, per quelo lo dise anca el Dotor; e no l'è miga stà nè un giorno nè dò... ma vinti giorni e vinti note che un minuto, che sia un minuto, no go abandonà quel leto!

Ter. Resto che ela la gabia podudo resister tanto!

Giov. Cossa vorla? Mi digo ch'el cuor suplisse a tuto.

Ter. Per questo xe vero... co penso anca a la mia Ema, povareta... che vita che la ga fato col so povero mario!

Giov. Ma sì, la me creda, co çerte le dise che no le pol resister, la diga pur che no le vol ben.

Ter. E... so zenero?... La me conta.

Giov. Oh! in quanto a lu..., vedela quel muro? ben, l'istesso!

Ter. Mi no voleva gnanca domandarghe, perchè za... sò...

Giov. E po', l'Ema gavarà dito....

SCENA II.

Rosa, Dette.

Rosa (entrando da la camera di Adele con un vassoio e sopra una scodella, un tovagliolo, un cucchiaio). Siora Teresa riverita.

Ter. Ve saludo Rosa. E cussì come vala de là?

Rosa. Proprio benin.

Ter. Va ris-cio che no sarè contenta anca vu?

Rosa. La se pol imaginar!

Giov. Gala tolto el so broetin?

Rosa. Sì, la lo ga tolto de gusto che no sò! e adesso la ga dito che se la lassa pur sola, che prima de levarse, la voria vardar de star un poco quieta.

Giov. Sì, sì, che la staga pur quieta e che la dorma, che za el dormir xe el megio dei rimedi. (a Rosa) Lo gala tolto tuto? Che veda... Ben, adesso andè in cusina, tolè suso quei stivai che go preparà lustrai sul fornelo, e portègheli al paron. E po'... aspetè: portèghe anca sta cravata che go fato su da novo. La varda, siora Teresa. (mostrandogliela).

Ter. Ma la par proprio nova fiamante!

Giov. Xe la seconda volta che la volto. (la consegna a Rosa che esce).

Ter. Gnanca brava dona che la xe, siora Giovana!

Giov. La diga pur benedeta, perchè za mi no ghe n'ò nissun merito... son stada arlevada cussì... Mia mama me diseva sempre che i marii bisogna conservarseli; se no, xe la mugier che fa cativa figura.

Ter. El mio inveçe el gera tuto diferente! Lu in casa no 'l voleva che fasesse gnente; el pensava tuto lu. Mi per la casa no gaveva pensieri, e se pol dir che tante volte me sentava a tola, senza gnanca saver cossa che ghe fusse da disnar.

Giov. Ma vorla meter? el suo gera un altro omo. Daniel xe un povero insampà... bon, bon che più no se pol dir... ma co la ga dito bon, la ga dito tuto.

Ter. El mio bon'anema — no fasso per dir — gera tenudo in considerazion da tuti; perchè lu gera capaçe de far una sentenza come un avocato e po' — se ocoreva — el gera bon, benedeto! de meter in speo un polastro megio de una coga. — E cussì gera l'istesso anca mio povero zenero co' l'Ema. — Lu, ghe piaseva che la sonasse, che la lezesse, che la curasse i so fiori, i so oseleti... ma certe façende de casa, gnente! El gera lu che prima de andar in mezà, pensava a tuto. Lu l'andava fora co' la serva, el faseva le spese; lu dal becher, dal biavarol... e po' el mandava a casa tuto!... La varda che per un toso xe molto!

Giov. El gera de quei tosi che se ga perso el stampo.

Ter. Ma proprio.

Giov. E inveçe nostro zènero mai contento! Ela gavaria fato i piè a le mosche pur de contentarlo... ma cossa vorla? pezo de gnente! Basta che ghe diga che ultimamente el se la faseva andar in studio a servirghe da modela per una statua ch'el gaveva da far. E là, con un puro abitin de tela, in mezo a l'umido, co quela salute... el voleva che la ghe stasse dò, tre ore, sempre ferma, senza mai moverse, senza tirar el fià... che la me tornava a casa sbasìa in t'una maniera, che za mi ghe digo che quela malatia la se l'à ciapada là!

Ter. Gnente de più facile!

Giov. La senta, siora Teresa, mi no digo che per el passà quela povareta no la gabia avudo qualche torto... ciò... se sà... se sà ben... sola, senza mama... co Daniel che doveva star tuto el giorno via, in man se pol dir de nissun... se sà ben che i açidenti... i fa presto a nasser... no la gaveva in fondo che sedese ani... ma se la ga fato qualcossa de mal, la pol dir de averlo scontà... si!

Ter. La fatalità xe stada che Daniel no 'l gabia pensà prima de tòrse da novo mugier!

Giov. Cossa vorla? Anca in quelo bisogna compatirlo! Lu ghe pensava suso a portarghe in casa una maregna...

Ter. Sì, ma ghe xe maregne e maregne... no xe po' miga dito che le sia tute compagne! Ela, per esempio, vorla dir che a quela tosa no la ghe xe stada una seconda mama?

Giov. Oh questo po' sì. Miga per vantarme, sala, ma ghe giuro che se la fusse stada mia fia, no podaria volerghe più ben. E xe per questo che co la vedo cussì malandada... a sofrir, benedeta, per un omo, che dopo tuto dovaria basar dove che la sapa... mi, cossa vorla... me sento un gropo in gola... e no me vergogno a dirlo, tante volte coro in camara a pianzer mi sola; perchè nualtre done, più che pianzer no podemo far!

Ter. Eh! povareta... Vorla che no capissa? ma bisogna che la se supera per quel povaro Daniel.

Giov. Xe quel che fasso sempre, se no lu se dispera.

Ter. La varda ch'el xe qua...

SCENA III.

Daniele, Dette.

Dan. Ah! siora Teresa... Anca ela xe qua? No la gaveva miga sentia...

Ter. Caspita! Volevelo che mancasse in una zornada come questa?

Dan. (vedendo Giovanna). E ti cossa gastu? Ti ga i oci da pianto? Percossa pianzer? Ghe xe nato qualcossa a l'Adele?

Ter. No, no, gnente! Anzi la me contava che ancùo la s'à da levar.

Giov. Cossa voleu che gabia? Caspita, che de le volte no vien i oci rossi da la contentezza? Se trata che l'altro giorno, quando che el dotor ga dito che ancuo la s'avaria podesto levar, se no fasso presto a meterghe una carèga soto... mi no sò...

Dan. Ciò, me son sentio un pochetin a tremolar i zenoci, ma basta!

Ter. Dopo tuto no ghe xe gnente da vergognarse. Oh bela! So fia la xe!

Giov. Ben, che adesso no fè tardi; che no ve toca a corer, che no vogio.

Ter. Valo in ufizio anca ancuo?

Dan. Se pensela? Vado un momentin dal Diretor a domandarghe che el me daga vacanza.

Ter. Voleva ben dir che no 'l fusse a casa ancuo?

Giov. (a Daniele, che fa per andarsene). Ma prima vegnì qua... Lassè che ve veda mi. V'aveu cambià de colèto? V'aveu tolto suso tuto? i guanti, i ociai, la ciave?

Dan. Sì, sì, go tuto.

Giov. E el fazoleto?

Dan. Ecolo qua.

Giov. Che veda?... No, quelo xe vecio. E el novo che v'aveva sopressà a posta?

Dan. Mi no lo go visto.

Giov. Ma se ve lo gaveva messo sul comò, a viçin de tuto el resto? Che benedeto omo che sè! Se ghe prepara tuto, ma se no se ghe mete tuto in man, lu no'l vede gnente. (Daniele fa per rientrare in camera). No, aspetè che andarò mi. (entra in camera).

SCENA IV.

Teresa, Daniele.

Ter. El vada là ch’el pol dir de esser stà ben fortunà a trovar quela dona. Anca in sta circostanza la ga dimostrà de aver un gran cuor.

Dan. Per questo, sì, saria un ingrato... posso dir de aver cavà bala d’oro; guai se no la gavesse avuda.

Ter. Perchè, disemola qua... i dotori xe bei e boni, ma lori co i ga ordinà le so riçete, i volta via... Xe l'assistenza che vol dir tuto per i povari amalai!

Dan. La senta siora Teresa, dato che la vedo qua... la me daga un parer...

Ter. Anca çento, benedeto! Dove che posso...

Dan. La varda mo’ ste do mostrine... (le fa vedere due campioni di stoffa) quala scegliarèssela?

Ter. Scometo che se trata de un abito per l’Adele?

Dan. Proprio. Ancuo el dotor ga tanto racomandà che la staga ben imbacucada.... cossa ghe par?

Ter. Xelo un ben ch’el ghe vol?... Mi me pararià che questa a righete la fusse la più adatada.

Dan. Anca ela? Anca mi. La xe la più cara, ma no importa. La me par la più greveta e la più molesina; la starà calda come un pulesin. Cossa disela?

Ter. Ma sicuro! E po la xe una tintarela delicata, de quele che no smaca tanto; perchè adesso la sarà un poco sbatudela, benedeta!

Dan. Se la vedesse!

Ter. Ah! ste fie... Se pol dir che le dà da far, sì! S'el savesse anca mi che pensier che el me xe adesso a doverla lassar andar via!

Dan. Xe proprio stabilio?

Ter. Eh! purtropo par che no ghe sia caso! Stamatina go dito che la vada dal Proveditor, ma go paura...

Dan. Me dispiase per l’Adele... la gera abituada a vedarla ogni giorno; le gera cussì amighe!

Ter. Mi digo che do sorele che se vogia tanto ben se stenta a trovarle.

Dan. Sfido! le xe cressude sempre insieme!

SCENA V.

Giovanna, Detti.

Giov. (entrando). Eco qua el fazoleto e anca la scatola. Vardè che la go impinìa, ma de no dar via tante prese... e adesso andè là perchè xe a momenti le nove (guarda alla parete). Sogio gnanca insempiada! vardo sempre là, senza ricordarme che no ghe xe più relogio.

Dan. Digo ben, vardava anca mi...

Ter. Lo gala dà da giustar?

Giov. Sì, e la indovina mo’, chi s'à assunto de giustarlo?

Ter. No savaria....

Giov. Quel mataran de Andrea...

Ter. Doveva imaginarmelo. Anca da mi, sala, el fa de tuto.

Giov. E da mi? Lu m'à giustà la machina del cafè, quela da cùser, po’ sta poltrona...

Ter. El xe proprio una perla quel toso!

Giov. Eh! sì ch'el fa anca lu el pitor!

Ter. Temperamenti diversi.

Giov. (Ciamemoghe pur temperamenti...) (a Daniele) Ben, dunque, andemo! No perdè altro tempo, che se no fè tardi. E imbotoneve ben el peto, che ancuo xe un'arieta fresca. No xe vero?

Ter. Sì, sì!

Dan. Eh! no abiè paure, che ancuo sento de sfidar el mondo. Patrone, patrone! (esce).

SCENA VI.

Teresa, Giovanna.

Ter. Povaro sior Daniel! El fa proprio consolazion...

Giov. Sì! ma cossa vorla? A vedarlo andar via co' quel soprabitin cussì tirà, me se strenze el cuor. Per mi no ghe bado.. Qualunque strazzeta me serve! Ma lu voria ch'el fasesse bona figura. Faseva conto giusto st'ano de poderghe tor una prussiana de quele col roclò, che sò ch'el ghe n'avaria vogia... Ma cossa vorla! Co gh'è dei amalai in casa — mi no sò come che la sia — va tuto!

Ter. La me lo diga a mi! Ma la scusa se ghe fasso una domanda che forse no dovarìa... Marcelo so zenero, no'l pensa a gnente? No'l li agiuta in gnente?

Giov. Cossa vorla ch'el me agiuta? Ogni tanto, co'l ghe pensa, el ghe dà qualcossa a la serva.

Ter. E sì che s'el lavorasse el podaria guadagnar; perchè, da quel che sento, el sarìa un artista dei primi. Me diseva giusto Andrea che adesso el xe drio a far una statua che la saria proprio un capo... da esposizion.

Giov. Ma sì, benedeta! La xe quela che ghe diseva. El xe giusto quel’anzolo per el qual el voleva che quela povareta ghe posasse. Ma adesso mi credo ch’el staga de le setimane senza gnanca andar drento in studio; che se no ghe fusse Andrea — per quel ch’el me dise, sala, perchè mi no me ne intendo — ch'el va lu ogni tanto a bagnarghe le cree, saria rovinà tuto!

Ter. Fortuna ch’el gabia anca de quei amici!

Giov. Mi no sò gnanca come che i fassa a aver tanta pazienza! ghe xe speçialmente quel’Andrea che ghe va drio come un cagneto.

Ter. El dise che bisogna compatirlo... che ghe vol pazienza... che bisogna conossarlo... e el giura e spergiura che el fondo de quel toso xe bon!

Giov. Sarà, benedeta! Ma molto in fondo... Basta! go dito che xe megio no parlarghene! Ma che vita! che vita! qua no se sà più da che banda torlo! Sempre col muso tanto longo; se se prova a dirghe cualche parola, anca co’ bona maniera, lu no ve dà gnanca risposta, el ve dà un’alzada de spale e el volta via!

Ter. Ma xelo un cambiamento!

Giov. E anca co’ quel’anima, sala, lu xe l’istesso! Ghe digo mi che in sta malatia çinque minuti filai in quela camera lu no ghe xe miga stà! E anca come... la varda: un spalancon de porta, che quasi sempre la ciapava un scorlon, un saludo tanto per dir lo go saludada. e po’ dove anduvelo? Sul balcon a sonar el tamburelo coi dei, su le lastre, finchè el ciapava suso e’l voltava via da novo! E tante volte, benedeta, la go vista a sugarse le lagrime col pinzo del linziol!

Ter. Ma sala che se no la me le contasse ela, le saria cosse gnanca da creder!

Giov. Co ghe digo che le par inventae. La senta ancora questa, siora Teresa, e dopo basta, perchè no se fa che intossegarse el fiel. Ancuo, s'intende, xe el primo giorno che la se ga da alzar, el dovaria esser un giorno de festa per tuti, no xe vero? Ben, sala cossa ch’el m’à dito?... che no'l sà gnanca sel podarà vegnir a disnar!

Ter. La me minciona?

Giov. El xe stà invida da un amigo, no sò dove, che no’l vedeva da ani; tute busìe, tute fandonie, per esser libero anca ancuo.

Ter. E l’Adele cossa gala dito?

Giov. Ela? El la podaria pestar in t'un mortèr, che quel’anima gnanca la arfiarìa! Ela xe come un can, che più che i lo bastona, più el ghe mena la coa.

Ter. Benedeta! tropo bona la xe!

Giov. La lo ga dito: Altro che tropo bona! Perchè se no la fusse stada bona, no la saria stada tanto disgraziada... No se lo sa? I omeni va giusto in çerca de quele; i sa de poderghe infenociar quelo che i vol... i ghe dise do parolete dolçe, un poche de mignognole... i ghe promete mari e monti — lore infeliçi, le ghe casca come peri gnochi — e po’ co i ga avudo quel che i voleva, bondì che te saludo. Marii o no marii, i omeni i xe tuti traditori! Cossa disela ela?

Ter. Mi digo che aver de le fie, in sti ani, xe un gran pensier. Ghe giuro mi, siora Giovana, che se tornasse a nasser, voria pregar el Signor ch'el me mandasse tuti mas-ci... Ah! sì, per carità. Almanco lori i sarà malagrazioni, i sarà senza creanza, ma no ghe sarà de sti pericoli. Ma le fie! arlevèle, bone, brave, che le dovarìa far la consolazion de una famegia, e inveçe... o se le vede sospirar come la so povera Adele, o rovinae come la mia Ema, benedeta! perchè mi ghe ciamo rovinada; averghe voludo ben a un omo, come quelo che ela ga voludo al so Stefano, che i se gaveva fato l'amor diese ani! e po' vèderselo sul più belo a portar via in quela maniera... la varda ben che la xe barbara, sala!

Giov. Manco mal che l'Ema stà ben!

Ter. Si, ma cossa vorla, no la xe più ela, la ga fato un cambiamento che no se la conosse più! Una volta la gera sempre cussì alegra, cussì de bon umor, che la se divertiva de tuto, che so papà benedeto el la ciamava la so strambèra... adesso inveçe...

Giov. La vedarà che la tornarà, la xe tanto zovene...

Ter. Dio lo volesse, ma no ghe vedo ciaro... Xe passà quasi dò ani, sala, e semo sempre a quele!

Giov. Vorla meter co' i primi tempi?

Ter. Sì, co la xe in mezo a la zente, la varda de superarse e anca co' mi, benedeta, la procura de farse veder manco che la pol... Ma cossa me importa, che no ghe xe sera che co la va in leto, no la senta a pianzer soto le coverte!

Giov. Ciò, se vede che la ga voludo ben sul serio.

Ter. Sì, ma in tuto dovaria esserghe un limite, me par... Fin per quela cugnada, cossa no gala fato? La sà che Stefano, povarelo, gaveva una sorela che xe in bisogno? Ben! mi no sò cossa che no la gabia dà... e vestiti, e biancheria... de tuto! fora che quei recini che la ga in recia, che, benedeto, el ga donà el zorno del matrimonio... Ela, povareta, se pol dir che la se ga privà de tuto!

Giov. Va ris-cio che anca mio zenero faria cussì! La se figura che l'altro giorno go trovà in mezo a le scoasse una croseta che gaveva donà l'Adele.

Ter. Mah... i omeni xe un'altra cossa... i dise che i ga un'altra maniera de sentir.

Giov. La senta, siora Teresa. Dirò un sproposito, dirò un'eresia, ma la me lassa dir... quelo xe un omo che se la me bada a mi, lu no'l vede l'ora che Dio se la toga...

Ter. Via, siora Giovana, cossa mai disela? Questa xe un'esagerazion.

Giov. Sì, sì, benedeta, lu xe cussì, lu no'l vede l'ora de restar libero.

Ter. Andemo, la tasa, che ste robe no le ga da sentir gnanca i muri. (si batte) Ah! i bate...

Giov. Chi xe?

Emma (d. d.). Son mi, xe permesso?

Ter. Ah! Ema, mia fia!

SCENA VIII.

Emma, Dette.

Emma (entra trafelata, vivace). Oh! patrona siora Giovana. Bondì mama. (la bacia).

Ter. Cossa gastu che ti xe cussì scalmanada?

Emma. Gnente, go caminà in pressa per paura de far tardi. L'Adele xela alzada?

Giov. No, benedeta.

Emma. Alora son contenta.

Ter. E cussì dove xestu stada?

Emma. Son andada in tanti siti: prima de tuto son andada a torghe dò o tre fiori per l'Adele, che so che i ghe piase tanto.

Giov. Benedeta!

Ter. E dal Proveditor, xestu stada?

Emma. Sì, mama. Ma tanto per contentarla, perchè za lo saveva prima.

Ter. Cossa l'àlo dito?

Emma. El m'à risposto un poco sustà, che insoma lu no'l sa cossa far, e che se no vogio perder el posto, bisogna che vada subito.

Ter. Anca subito?

Emma. Eh! cossa mai sarà? un giorno prima o un giorno dopo, zà xe l'istesso. Vorla sospirar per questo?

Ter. Vustu che me goda?

Emma. Cara la mia mama! la vedarà come la sarà contenta anca ela! El m'à dito che se trata de un bel paeseto; che ghe xe libertà, bone arie, bone aque e che se vive a bon mercà. Prima vado avanti mi, po' la vegnarà anca ela; za la se imbate de pochi giorni. Mi intanto trovarò una bela caseta, la metarò tuta in ordine, e co la vegnarà scometo che la me trova co' tanto de papòte! Gera stufa, mama, de star in cità!

Giov. Ti ga razon: qua no ti gavevi che de le brute memorie.

Ter. Per questo po' sì!

Giov. Dunque! La varda, fin l'Adele, che la se pol imaginar se ghe pianze el cuor a separarsene, anca ela la m'à dito: mama, in fondo go gusto che l'Ema vada via, perchè da qualche tempo la gera cussì palida, cussì de malumor, la me faseva pena e spero che cambiar aria ghe fassa ben.

Emma. Sì, la vedarà che grassa che deventarò! un balon!

Ter. Dio lo vogia!

Emma. E l'Adele, posso andarla a trovar?

Giov. Abi pazienza! la gaveva dito che la lassassimo un momento quieta; ma adesso vado a veder mi.

Emma. Alora la speta, che se la xe svegiada, ghe dago una roba che la ghe porta.

Giov. Cossa vustu che ghe porta?

Emma. Anzi nol no la ghe diga gnente. Ghe lo dirò mi.

Giov. Eh za, voialtre gavè sempre fufignessi. (entra da Adele).

Ter. Bisogna proprio dir che a sto mondo no gabia da esserghe nissun de contenti. Pareva che dopo tuto quelo che i ga passà, i gavesse da aver un fià de quiete, da esser un pochetin tranquili... ciò i la gaveva maridada, pareva che el fusse un bon partio... e inveçe....

Emma. E invece cossa?

Ter. E inveçe quela povereta la xe là che la se distruse, e che ghe toca a ingiotir lagrime. In verità che ghe xe de le volte che pararia fin che fusse stà el Signor che ga volesto castigarla!

Emma. No la diga cussì, mama! perchè in sto caso el Signor sarìa stà tropo cativo!

Ter. Mi no digo che la lo meritasse, perchè mugier più bona de cussì no la gavaria podudo esser: ma dopo tuto, se se vol esser giusti, no la gavaria dovudo maridarse.

Emma. E xela stada ela?

Ter. Lo sò ch'el xe stà lu, ch'el ghe xe stà a drio, ch'el gera inamorà morto; ma anca ela la gera inamorada fin sora i oci.

Emma. Ma inamorada e tuto, la saria piutosto morta che dirghe de sl. Xe sta siora Giovana e el so povero papà che no ghe pareva vero, e che a forza de pregarla e dirghe che no ghe xe gnente de mal i la ga persuasa a risponderghe de sì. In fin l'ultima sera che go dito: dunque a revederse Adele, la me s'à butà a brazzacolo e la m'a dito: Ema, Ema, se ti sentissi!!! E mi go domanda: E no ti xe contenta?... Contenta? saria feliçe, ma me sento morir! Tanto che la ga fato pecà anca a ela, mama, e la ga dito: va là, Adele, no starte a tormentar tanto! e lassa che te diga sta roba: se mi gavesse un flo, saria ben contenta ch'el trovasse una mugier come ti.

Ter. Cossa vustu che te diga. Gavaremo avuo torto tuti!

Emma. Come? Xela anca ela una de quei che dise, perchè a una povera tosa ga tocà una disgrazia — per quanto che dopo la sia bona, onesta — che no la merita più misericordia?

Ter. Via! no scaldarte tanto! Digo solamente che se la fusse stada da maridar, no la gavaria avudo da passar tute ste pene. Eh! chi gera sta scotà da l'aqua calda, doveva aver paura anca de la freda!

Emma. Per carità, mama, no la staga a far de sti confronti! Marcelo dopo tuto xe sempre stà un galantomo, e come ch'el ga vossuda ben una volta, el podarà volerghene ancora.

Ter. Magari pur, ma no credo.

Emma. E mi inveçe son sicura.

Ter. Ti ti xe giovine, e de omeni no ti ga conossudo che el to Stefano, ch'el gera una perla: ma co i omeni scomincia a stufarse de le mugier, novantanove volte su çento vol dir che i xe inamorai de un'altra, e alora la xe fata!

Emma. Eh mama! cossa mai se pensela!

Ter. Cossa vustu saver ti?

Emma. Mi no sò gnente, ma giuraria de no.

Ter. Za, ti ti xe come el to povaro mario, che no credeva mai al mal.

Emma. Perchè i se voleva ben col mio povero Stefano, e anca perchè co' lu più in là de Marcelo no se andava.

Ter. El to povaro mario, el gera bon lu, benedeto, e ghe pareva boni tuti!

Emma. Sì, ma ghe voleva ben anca Marcelo; e no podarò mai desmentegarme che quando ch'el s'amalà de quela bruta malatia... che tuti scanpava lontani... lu solo xe restà co' mi a farghe da infermier fin a l'ultimo momento.

Ter. Sì, xe vero... ma varda mo' adesso! che no ghe xe volta che vegna fora el discorso de quel povareto, che lu no ghe meta una ponta de velen... Ciò, mi no digo ch'el fusse una cima... ma ai so alari, al so mezà el ghe tendeva come un vecio... e cossa serve che ogni volta che se parla de lu e che se dise per esempio: — Anca el povaro Stefano la pensava cussì... lu el fassa quel soriseto... come dir «Quelo là gera un povaro mamo!»

Emma. Ma no! Gavarà parso a ela mama: mi no me ne son mai incorta.

Ter. Ti ti lo disi co la boca. Ma de le volte t'o visto a far i oci rossi quando ch'el te tormentava per el vestito nero... ch'el diseva che le xe caricature... e perchè ti andavi al çimitero... e perchè ti porti sempre quei recini.

Emma. Ma no, mama...

Ter. Fin el ritrato! Basta dir quelo! Nol gera forse stà lu, che apena nata ia disgrazia, se gaveva oferto de farghe un busto da meterghe su la tomba?

Emma. Sì, xe vero.

Ter. E te lo galo più fato?

Emma. El dise che no'l ghe xe riussìo.

Ter. No xe vero, perché ti stessa ti m'à dito che quando l'Adele te ga condoto a vedarlo in scondon, te xe vegnudo squasi mal... tanto el te pareva vivo.

Emma. Sì, ma se dopo el s'à rovina... i xe açidenti che pol nasser... la ghe domanda mo' anca a Andrea.

Ter. Mi no credo a gnente.

Emma. Ma mama, cossa vorla concluder insoma col tirar fora sti discorsi?

Ter. Vogio concluder ch'el xe un egoista belo e bon... e che ti no ti dovaressi difenderlo tanto.

Emma. Mi lo fasso per l'Adele.

Ter. Lo so. Ma te digo che s'el credesse mai de tormentarte anca ti come ch'el tormenta l'Adele, mi una volta o l'altra ghe digo qualcossa.

Emma. Ma mama! Guai a ela!

Ter. De cossa gastu paura?

Emma. De gnente... Ma presto andemo via; cussì saria inutile... La tasa!

Ter. Cossa gh'è?

Emma. Me pareva de sentir la voçe de Andrea.

Andrea (d. d.). Lassè, lassè che la porto mi.

Ter. Sì, l'è proprio lu.

SCENA IX.

Andrea, Dette.

And. (si affaccia alla porta, in una mano ha il cappello, nell'altra un involto. È spigliato ed allegro). Siora Teresa, siora Ema riverite. La mia parona no ghe xe?

Ter. Chi xela mo' sta so parona?

And. Oh bela, siora Giovana.

Ter. Ah! ah! La xe andada un momentin de là. Ma intanto el vegna avanti, che almanco co' lu se se verze el cuor.

And. Cossa voleu dir?

Ter. Vogio dir che lu almanco xe sempre alegro, sempre de bon umor!

And. Se cerca de darla da intender! Mi go sempre avudo sta massima, che co' la zente no bisogna mai tirar suso. Ma da resto, se la savesse: Se a ciascun l'interno affanno... co' quel che segue.

Ter. Va ris-cio ch'el me la dà da intender

And. No la crede? Alora la tasta qua. (indica in parte del petto).

Ter. Cossa gogio da sentir?

And. La tasta, no la sente gnente?

Ter. Sento una roba dura.

And. Sala cossa che la xe?

Ter. No savaria...

And. Un revolver sempre pronto per quel giorno....

Ter. Qualo giorno, caro lu?

And. Per quel giorno che no la vorà darme so fia!

Ter. Ah! ah! lo sentistu Ema?

Emma (in disparte, mettendo fiori nel vaso). Sì sì, mama; vorla che no senta?

Ter. Ah! Adesso capisso per cossa che l'altra sera v'ò catà in conciliabolo!

And. Gavemo anca noialtri i nostri segreti.

Ter. Ben, me dispiase a dirvelo... Ma se la gavè da far, fela subito; perchè a un pitor no ghe la daria per tuto l'oro del mondo.

And. Perchè semo tropo disperai?

Ter. No, ma tropo mati de sicuro!

And. Pecà che in sto momento gabia le man impedie, se no ghe lo faria veder!

Ter. Andè là che sè un gran mato! E in quel fagoto, cossa gaveu?

And. (depone l'involto). Go un relogio che m'à dà siora Giovana da giustar.

Ter. La mà dito sì... Ma cossa xelo deventà anca relogier?

And. La xe stada sempre la mia passion. La varda qua che ghe n'ò un altro che m'à dà el toso del barbier... e questo cocolin el xe de la mia morosa.

Ter. E po' no'l vol che se ghe diga mato!

And. Sì, ma mato bon.

Ter. Ah questo po' sì! Megio sempre vu che çerti altri che xe mati e anca cativi... no sò se me spiego.

And. Cossa vorla far? Guai se a sto mondo se fusse tuti compagni.

Ter. Andè là che anca vu sè sempre pronto a difenderlo!

And. Chi?

Ter. El vostro amigo Marcelo!

And. Mi no difendo nissun. Mi digo anzi ch'el ga torto; ma bisogna aver pazienza, perchè l'è stà sempre cussì. Co no'l lavora, el se mete in malinconia, el ghe fissa suso, el deventa..

Ter. E percossa no lavòrelo?

And. Perchè el dise che no'l xe bon.

Ter. E perchè no xelo bon?

And. Oh Dio! perchè co se ga qualcossa per la testa, no gh'è nissun che sia bon de far gnente.... e la capirà che la malatia de so mugier...

Ter. Ma seu dasseno tanto sempio da creder che sia la malatia de so mugier, dopo quelo ch'el la fa patir? No, no, benedeto, badème a mi che son vecia; qua soto ghe xe qualcoss'altro!

And. E cossa vorla che ghe sia?

Ter. Oh bela! una dona!

And. Ma gnanca per idea!

Ter. Sentì Andrea, mi no m'à mai piasso meter la mia pezzeta dove che no i me ciama... ma scometaria che qua soto ghe xe una dona!

And. Ma vorla che mi no lo savesse? Vorla che no me ne fusse mai inacorto? che no'l m'avesse mai dito gnente?

Ter. No'l gavarà mai dito gnente perchè el se vergognarà, perchè se tratarà magari de qualche poco de bon.

And. Ma cossa ghe vien in mente? la me creda a mi che no xe vero.

Ter. Sì, sì, e de una sgualdrina; perchè le xe giusto quele fate a posta per menar per el naso i omeni; no le xe che lore che ghe fassa perder la testa in sta maniera. Cossa ghe importa a lore de rovinar una famegia! Anzi le se la gode!

And. Co la ga sta fissazion, mi no sò cossa far!

Ter. Se la savaremo contar!

Giov. (d. d.). Siora Teresa! Siora Teresa!

Emma. Ma mama, la la finissa! No la sente che siora Giovana la ciama?

Giov. (si presenta alla porta).

Ter. La me scusa...

Giov. Podaressela vegnir un momento de qua?

Ter. Vegno subito. Cossa vorla?

Giov. La vol che la veda anca ela l'abito che la s'à da meter. Benedeta! No la ga altro pensier che quelo de poderghe piàser a so marìo. (escono Giovanna e Teresa).

SCENA X.

Andrea, Emma.

And. (dopo un momento, avvicinandosi ad Emma). E ela, andemo avanti, no la se lassa andar cussì, se no l'andarà a finir che so mama se ne incorzerà dasseno!

Emma (Commossa). Oh s'el savesse, Andrea, quanto che patisso co la sento a far de sti discorsi. E sempre la me ripete la stessa antifona, salo, e no la sa che ghe xe de le parole che mi me par che le me vegna drento in tel cuor, a sfuregarme come tante stiletàe!

And. E vorla darghe peso? So mama la dise cussì perchè no la sa gnente.

Emma. Ma son mi che de le volte penso che no sia vero, che no la possa aver razon, che sia stada mi che senza volerlo, lo possa aver lusingà, che sia tuto per colpa mia. Ah! s'el savesse, Andrea, che martirio cho xe questo... vedar quela povera creatura che se dispera, che sofre, che patisse... e dir che son mi la causa.

And. Ma cossa vorla tormentarse? In fin dei conti, ela ga fato tuto quelo che la podeva, e la ga domandà ela de andar via. Cossa podevela far de più?

Emma. Per carità, salo, che no ghe sbrissa co' la mama.

And. No la gabia paura. Ela dunque no la ga da aver rimorsi, la me creda. La xe stada una vera disgrazia!

Emma. Ah! s'el savesse, Andrea, de le volte me torturo perchè gavaria dovudo incorzermene prima; ma mi no saveva, mi no credeva... sarò stada una sventada... ma da principio credeva ch'el me volesse ben come a una sorela. El gera lu ch'el me parlava del povaro Stefano, ch'el mostrava de compianzerme tanto... no xe stà che dopo, un poco a la volta ch'el ga cambià, fin che un giorno ch'el m'à visto un fior e el m'à domanda se podeva darghelo, e che mi go dito che no podeva perchè lo gaveva rancurà in çimitero da quel povareto, lu el me l'à tolto fora de man, e facendolo in tanti tochi, el m'à dito: Cussì la capirà de chi che so geloso! Oh! ghe giuro che quel giorno go credudo de deventar mata! Mi saria scampada via subito, ma l'Adele stava mal, tanto mal, e la me voleva sempre viçin... come podevu lassarla! E son restada, çercando de no incontrarme mai sola co' lu, schivando ch'el me parla, e aspetando el giorno che l'Adele staga megio per poder andar via.

And. Oh! quel toso! quel toso! ghe giuro ch'el me fa paura!

Emma. No, Andrea, no'l me diga cussì. El me diga piutosto che quando sarò via el çercarà anca lu de calmarlo, de farghe capir razon, de persuàderlo de volerghe ben a la so Adele che lo adora tanto e che no la merita de esser tratada cussì! El me diga, Andreal el me prometa ch'el ghe parlarà anca lu...

And. Ma credela che sti discorsi no ghe li gabia mai fati? Se la savesse quante volte che go dito «Ma insoma! abi un poco de riguardo almanco per la zente, perchè in fondo la xe to mugier, ti la ga scelta ti, ti ga voludo ben»... Ma lu, sala un giorno cossa ch'el m'à risposto?

Emma. Cossa?

And. «Ah! Anca ti ti lo credi? Eben, sapi che no xe vero gnente, sapi che se la go sposada, se me son messo sta balza ai piè xe stà...» Ma no, son un sempio mi a dirghelo. Xe megio che lassemo là...

Emma. No! el me diga!

And. Eben sì... Xe sta proprio per mostrarghe a Stefano ch'el gaveva avudo torto de sospetar...

Emma. Ah?... Stefano?

And. Proprio lu. Perchè una sera ch'el gera andà a trovarlo pianzendo, el gaveva dito: «Senti Marçelo, nualtri semo stai sempre amiçi, quasi come fradei; eben, dime se xe vero quelo che i me ga riferìo; che a la sera ti vien sempre a casa mia, perchè ti ghe fa la corte a mia mugier?.... Dime la verità su la memoria de to mama. No creder che lo vogia far scene, ma se fusse vero, sò mi quelo che me restaria da far.» Naturalniente Marçelo ga negà, ga dà del mato, e per provarghe che no gera vero gnente, ghe xe sbrissà de dir che anzi, se a la sera l'andava da lu, gera perchè là el podeva veder l'Adele. El povero Stefano alora ga butà i brazzi al colo, e tuto contento el ga risposto: E alora percossa no me gastu mai dito gnente? — Perchè go paura che no la me corisponda. — Ma che! ma che lassa che farò mi... parlarò mi co' l'Ema, e ti vedarà che ti sarà contento. E cussì per una parola che ghe xe sbrissada a fin de ben, el s'à trovà impegnà per tuta la vita!

Emma (che avrà seguito con ansia il racconto). Oh! Andrea! Andrea! cossa ch'el me dise!

And. Sì, lo sò ben che son stà un sempio; che gera megio che no ghe disesse gnente! Ma cossa vorla? Dopo tuto gnanca lu... el sarà stà un colpo de testa, mi no digo de no... ma el gaveva sentio da ela a dirghene sempre tanto ben, che per riflesso la ghe gera simpatica; e cussì el ga sperà che un poco a la volta l'afeto saria vegnudo e ch'el saria guarìo. La fatalità xe stada che nassa la disgrazia de quel povareto; e alora ga parso da quel momento de averse fabricà lu, co' le so man, la so rovina!

Emma. Oh povera Adele! E dir che senza volerlo go contribuìo anca mi a sacrificarla! Dunque son stada mi anca in quelo! Sì, perchè son stada mi che la go persuasa de dirghe de sì... che la go persuasa a volerghe ben!

And. Andemo via, adesso no la ghe fila suso... se no la me fa disperar proprio dasseno de averghelo dito.

Emma. Dunque son mi che ga da aver anca sto rimorso?

And. La se quieta, che no vegna qualchedun; no la sente che xe qua so mama...

SCENA XI.

Teresa, Giovanna, Adele, Detti.

Ter. (entra camminando a l'indietro con Adele che si appoggia al braccio di Giovanna). Ema! Ema! no ti vedi che bela improvisata che t'à voludo far l'Adele!

Emma (precipitandosi e abbracciando Adele con uno scoppio di pianto). Oh Adele! Adele mia!

Ter. (dopo una pausa un po' lunga). Ma vardè se ghe xe razon de pianzer tanto!

Ad. (dolcissima, con affetto). Ma sì, Ema mia, no ti vedi che stago hen?

Emma (sforzandosi). Sì, Adele, ti ga razon. Ma cossa vustu? pianzo perchè son tanto contenta de vederte.

Giov. Sì ben, ma adesso me par che basta. La ghe lo diga anca ela, siora Teresa.

Ter. Andemo... cossa vorla! Fa tanta consolazion a vedarle a volerse tanto ben. Piutosto la me diga: lo salo el dotor che la vegniva de qua?

Giov. Càspita! no vorla? El xe stà anzi lu ch'el ga voludo che ghe preparemo sta camera qua, perchè la xe più ariosa e la ga più sol. La gera quela de Daniel.

Ad. Povaro papà! E lu dove xelo andà?

Giov. Lu el xe andà in sofita, ch'el xe tuto contento. (a Andrea che nel frattempo s'avanza con una poltrona). Bravo, Andrea, el la meta qua.

Ad. Oh Andrea che lo veda, che lo saluda anca lu.

And. (commosso, le bacia la mano). Benedeta!

Ad. Xe tanto tempo che no se vedemo!

And. Proprio. Ma adesso la stà megio.

Ad. Fin che la dura!

Giov. Ohe digo! no vogio miga che ti disi de sti sempiessi; che ti scominzi coi soliti discorsi! Piutosto sèntite, che no ti fassi trope bravae!

Ad. No mama... l'aspeta un momento che varda... me par ancora un sogno!

Giov. Sì, sì, fia mia. Varda per tuto, cossa te par?

Ad. Che bela poltrona!

Giov. Te piasela? La ga anca el so scagneto compagno, de quei che se ghe mete dentro el scaldapiè, e po', varda, l'avemo messo una stua nova col so paravento.... fin l'orologio!

Ad. Xelo quelo che ga giustà Andrea?... E lo galo giustà pulito?

And. Corpo de baco! Se no'l spacarà el minuto, no la me darà gnanca un çentesimo!

Ter. Per quelo se pol dirghelo sul viso. Co l'è passà per le so man, se pol esser sicuri.

And. Fala per torme via?

Ter. No, ghe lo digo sul serio. Ma gnanca per questo no'l se lusinga, salo!

And. De cossa?

Ter. Ciò... el s'à desmentegà? No ti sa, Adele, quelo ch'el me diseva prima? Che se no ghe dago la mia Ema, lu se mazza... El m'à fato sentir anca el revolver, no xe vero?

And. Ecolo qua (lo mostra).

Giov. Ohe! ohe! digo, che no ghe salta un rèfolo...

And. La se quieta. El xe un revolver de un brigadier de finanza, ch'el me lo ga portà perchè ghe descanta el grileto.

Ter. A vu siori! Anca l'armariol!

And. Cossa vorla far? bisogna darse coragio.

Ad. Almanco lu el xe sempre alegro. E... Marcelo, lo galo visto?

And. No, ma adesso go da passar per el so studio, e se lo trovo, ghe lo compagno qua.

Ad. Magari! ma s'el lavora, go paura ch'el se susta, xe megio ch'el lo lassa quieto. Mi spero che prima ch'el vada al Lido, el vegna un momento a casa.

And. No la gabia paura, che sò quelo che go da far. (per partire).

Ad. Grazie, ma basta che no'l lavora. Perchè s'el lavorasse, no vogio che i lo disturba.

And. No ghe sarà de sti pericoli. Vogio dir che no la gabia paura, che sò quelo che go da far. (va per partire).

Ter. Ben, s'el va via, l'aspeta che vegno anca mi.

Ad. Scàmpela via anca ela?

Ter. Za, co te lasso l'Ema, ti ti xe contenta istesso. Tornarò a torla.

Ad. Oh sì. Basta che la me la lassa anca a disnar.

Ter. Per mi, se la xe contenta.

Emma. Te pensistu?

Ad. Percossa?

Emma. Vustu che lassa la mama sola?

Ad. Ti la ga lassada tante volte fin che gera malada...

Emma. Ma adesso ti stà ben!

Ad. Razon de più.

Emma. No no, no posso. Go anca tante faturete da far!... e po ti sà, go paura che ghe possa secar a Marcelo...

Ad. (trista). Oh!... per quelo, lu no'l ghe xe gnanca.

Emma. Cossa? gnanca ancùo?

Ad. (mortificata). El m'à dito che xe arivà un so amigo pitor che no'l vede da tanti ani e che ancùo i ga da andar a disnar al Lido insieme. Lo conòsselo lu, Andrea?

And. Altro che conossarlo!

Ad. Xelo bravo?

And. Mah! co'l gera qua no'l gaveva gnanca i soldi da cromparse i colori; ma in sti ani par ch'el gabia trovà el modo de farse i bezzi.

Ter. Ciò... el se fassa insegnar el segreto!

And. El segreto xe presto dito; bastaria poderse trovar una de quele scolare ch'el ga savudo scovar fora lu... vedova... e che se fa condur da lu per studiar l'arte antica.

Giov. El me ne diga tante! E lu el ghe ciama scolara?.... go capio... (verso l'Adele). Ma ti no starte miga afanar par sta roba, che se anca no ghe xe to marìo, ghe saremo noialtri, to papà e to mama che te vol tanto ben.

Ad. Oh per mi, mama, la sa ben che ghe son abituada; piutosto ela no la ghe diga gnente. Mi co sò ch'el se diverte, me basta.

Giov. (a Teresa). Gala sentio? Cossa gaveva dito? Xela gnanca un anzolo!

Ter. (baciandola commossa). Va là, ciapa un baso, che in paradiso ghe n'è co' manco meriti! (si asciuga gli occhi) (p. p. a Giovanna). No, no la staga a disturbarse.

Giov. La lassa che l'acompagna; za go da andar un momento in cusina anca mi. (piano a Teresa). E cussì, come la gala trovada?

Ter. Mi ghe digo la verità che son proprio contenta. Oh Dio... se sà che la xe un poco palideta, un poco debole, ma le xe cosse che passa.

Giov. Basta! Ma quelo che tremo, xe che la possa tornar indrio... perchè el dotor m'à dito che ghe ocoraria un sito quieto, tranquilo, senza la più picola emozion. Oh Dio... malatie de cuor, se sa ben!

Ter. Andemo; adesso no la vada a pensar a ste robe. Intanto ciapèmo el ben, che al mal ghe xe sempre tempo.

(Giovanna e Teresa escono).

SCENA XII.

Adele, Emma.

Emma. (quando sono usciti, andando a sedere). Finalmente semo sole!

Ad. Cossa gastu?

Emma. Sèro ste porte, perchè no vegna nissun a disturbarne.

Ad. M'astu da dir qualcossa?

Emma (con vivacità affettuosa). Te go da dir tante cosse. E prima de tuto, varda, te go da dar un baso, ma proprio de quei cussì; come la mà dito ela, el mio cuor... (dà un bacio a pizzicotto, come fanno i bambini).

Ad. (con scatto di gioia). Ah! ti xe stada a trovarla?

Emma. Sì, stamatina (sottovoce). Ah! se ti gavessi visto come la me xe corsa incontro! coi so brazzeti averti, apena che la mà visto.

Ad. Dassèno?

Emma. Oh semo deventae amighe, sastu; quando che son là, no la voria più che vegnisse via.

Ad. E come xela vestia? Gavevela el so abitin pesante? le so calzete de lana? quele che go fato fin che gera in leto?

Emma. Sì! e che in bon che la se tegniva...

Ad. E de mi se ricordela ancora?

Emma. Va ris-cio! La m'à domandà subito, e mi gò dito che adesso ti stà megio, e che presto ti tornarà anca ti, e alora la ga voludo scriverte sta letara.

Ad. Cara! una letera! (l'apre con emozione e la bacia). E cossa vorla dir, vita mia, co' sti stramboti!

Emma. Te lo dirò mi. Che la te manda tanti basi e che, co ti andarà a trovarla, ti te ricordi de portarghe quel regalo che ti ga promesso.

Ad. Sì, tesoro mio! una piavola... L'ultima volta che son stada la m'à dito in t'una recia che ghe ne portasse una, ma de quele che dise papà e mama. Povara inoçente... proprio le do parole che ela no podarà mai dir!

Emma. Andemo, Adele mia, no agitarte, no comovarte cussì; se no; no podarò più dirte gnente!

Ad. No, varda. No pianzo miga. Povara la mia Ema, quanto bona che ti xe! e quanto ben che te vogio! Ti no ti pensi che per mi, e mi invece son condanada a no poder mai far gnente per dimostrarte tuto quelo che sento per ti.

Emma. E chi te dise che no ti possi far questo? Anzi varda, proprio ancùo gavaria da domandarte un piaçer, che se ti me prometi de farmelo, sarò mi, Adele, che dovarò esserte grata per tuta la vita.

Ad. Magari fusse vero!

Emma. No ti credi? Alora lassa che me senta qua viçin de ti, cussì podaremo parlar megio. Ben, senti Adele. Xe tanto tempo che voleva dirtelo, ma go voludo spetar che ti stassi megio, che ti fussi levada. Senti dunque. Ti m'à dito tante volte ch'el to tormento più grando xe quelo de saver quel'animeta in man de quela zente? Bona zente sì, zente de cuor, ma senza educazion, che no sa, che adesso la manda a scuola, ma che da qua qualche ano, co la sarà grandeta... no i sarà più in caso de insegnarghe gnente.

Ad. Purtropo, el xe el mio pensier de tuti i zorni e penso che no podarò far altro che meterla in colegio.

Emma. In colegio? povara creaturina! Se ti savessi come la s'à messo a singiozzar apena go domandà se gavaria piasso andar in colegio. La me s'à butà co' i brazzi al colo, che no la me molava più.

Ad. Percossa me lo distu, Ema?

Emma. Perchè la saria una crudeltà.

Ad. El sarà el mio castigo, quelo de resister a quele povere lagrime inoçenti. Quando che se xe stae cative mame come mi, no se ga più dirito de lagnarse de gnente!

Emma. Cativa mama? E cossa podevistu far ti alora, cussì putela?

Ad. Doveva tegnirmela co' mi; sfidar tuto el mondo: morir magari da la vergogna, ma tegnirmela co' mi.

Emma. Ti no ti ghe n'à avudo colpa. Xe stà to barba prete che no'l ga voludo, per el to ben.

Ad. Sì, el ga avudo paura del scandolo, senza pensar ch'el scandolo xe questo, Ema, de una mama che dopo aver messo al mondo una povara creatura, la l'abandona in man dei altri, de zente estranea che fa finta de volerghe ben, ma no xe che interesse.

Emma. Sì, xe vero; ma quietite, Adele mia. Mi credo de aver trovà el rimedio; mi credo de aver combinà tuto pulito. Senti: ti sa che adesso go da andar in un paese lontan dove che nissun me conosse... son sola al mondo... la mama stà a veder se la podarà gnanca vegnir... eben, se te disesse, se te pregasse, se te scongiurasse de lasarme a mi quela to creaturina? Oh Adele! te giuro che ghe voria ben come che la fusse mia, ghe faria mi da mama, me la tegnaria sempre viçin! Dime de sì, dime che ti saressi contenta! Oh se ti savessi come che ti ne faressi feliçi tute do! Sì, anca ela, perchè, no criarme Adele, co la go vista a pianzer, go domandà se invece de andar in colegio, la saria contenta de vegnir via co' mi... Alora no te posso dir co' che oceti la mà dito subito: mi sì che saria contenta! bastaria che i me lassasse!

Ad. (all'estremo della commozione). Cossa mai me distu? Cossa mai le pensistu?

Emma. Percossa? Credistu dunque che sia restada sempre una bambina sventada, una legierona, che parla senza saver quel che me digo? No, no te giuro che go pensà a tuto! che xe tanto tempo che ghe penso... Lassime finir; lassa che parla. Senti, Adele, oramai mi son vedova; no go da render conto più a nissun, la mama la xe vecia, e po' no la vede che per i mii oci. Eben! mi ghe dirò a tuti che la xe una putèla a la qual me son afezionada e che go voludo torme co' mi. Ti alora, ti podarà vedarla co ti vol senza più paure, senza scondagne, ti vegnaressi a star dei tochi co' mi in campagna, opur mi durante le vacanze vegnaria da ti, podaria lassartela, ti te la tignaressi a cresima, ti deventaressi so santola, e mi ghe insegnaria a volerte tanto ben! Ma pensa che felicità che la saria per tuti! Mi gavaria trovà un scopo ne la vita, ela saria beata, e ti ti podaressi dedicarte tuta al to Marcelo, che alora te tornaria a voler ben come prima, perchè no ti gavaressi più tristezze, el te vedaria sempre alegra, sempre contenta, sempre atorno de lu, a no pensar altro che per lu!

Ad. Quelo che ti me disi saria la mia beatitudine, saria la feliçità de tuta la mia vita!... go paura, Ema; no posso...

Emma. Ma percossa? Dime una razon! Ma no ti sa dunque che el mio sogno xe sempre sta quelo de aver una hambina? che xe questa la grazia che go sempre domandà al Signor?

Ad. E giusto per questo, Ema; chi te dise ch'el Signor no possa esaudirte? Chi te dise che no'l possa ancora mandartene de tui? Ti ga ancora tuta la vita davanti de ti!

Emma. Ti credi dunque che mi podaria tornarme a maridar?

Ad. Ti xe ancora giovine, tropo giovine per poder dir cussì. Gavemo forse i stessi ani, ma le disgrazie m'à fato deventar tanto più vecia de ti. Ti no ti sa che un giorno ti podaressi incontrarte in un omo ch'el te disesse de volerte ben, ch'el fusse degno de ti, e davanti al qual no ti savaressi resister?

Emma. No, Adele! Ti lo sa che ormai per mi la vita xe finia.

Ad. Ti lo credi, perchè el to cuor in sto momento te dise cussì, ma no fidarte! Ancùo te par impossibile, te par che no podarà mai vegnir quel giorno, te par che piutosto ti moriressi che dirghe de sì a un altro omo! Ma credistu ti, Ema, che sti proponimenti no me li fusse fati anca mi; credistu che dopo la mia disgrazia m'avesse parso che mai, mai, saria vegnudo el giorno che gavesse podudo sentir qualcossa per qualchedun? E pur ti vedi, non solo el xe vegnudo, non solo go volesto ben un altro, come no gavaria mai pensà che se podesse voler ben, ma per lu go desmentegà tuto, anca quelo che una dona no dovaria mai desmentegar... e sento che anca adesso per lu daria la vita.

Emma. Ma ti, xe un altro conto, quelo che ti ghe volevi ben, te ga tradio, te ga inganada, t'à abandonà! Che sentimento podaressistu provar per lu?

Ad. Ma mi gaveva anca dei doveri che ti no ti ga.

Emma. Sì, sento quelo che ti vol dir, ma no ti pol saver, Adele, cossa che sia averghe voludo ben a un omo che v'à adorà come che m'à adorà el mio Stefano! e po' vederselo a morir cussì! Oh! te giuro che in sto caso no pol restar altro che dedicarse a la so memoria.

Ad. Ema! Ema! tuti questi xe bei proponimenti. Ti adesso ti disi che no ti vol che consacrarte a la so memoria... ma xestu ben sicura che per quel povareto ti gavarà sempre, sempre... l'istesso sentimento? Ma no ti sa che in sta vita ghe xe un destin ch'el va al dessora anca de la nostra volontà? Varda... ti m'à contà ti, che quel povareto prima de morir gaveva voludo che ti ghe façessi la promessa che ogni ano nel giorno del vostro matrimonio ti saressi andada a trovarlo e ti gavaressi portà dei fiori su la so tomba? Eben... l'altro giorno ti m'à domandà quanti che ghe n'avevimo del mese, mi credeva che fusse per quelo e t'ò dito la data sospirando, e ti, Ema, no ti te n'à gnanca acorto.

Emma (vergognosa). Oh... oh...

Ad. (accarezzandola con affetto). No, no avertene per mal. Mi te lo go dito solamente per mostrarte che bruti scherzi che de le volte pol far el tempo. Xe la prima volta che la te nasse, son sicura, e Dio sa, povera la mia Ema, in dove che ti gavevi la testa in quel momento! Ma anca questo dovaria bastar per provarte che, pur tropo, a sto mondo no se pol mai esser sicuri de gnente!

SCENA XIII.

Giovanna, poi Rosa, Dette.

Giov. (entrando). Ciò Adele, varda che i ga sonà a la riva.

Ad. Sarà el dotor.

Giov. Oh sì! la xe una gondola a do remi, che pararia d'albergo.

Ad. Chi vorla che sia? I s'avarà sbalià!

Giov. Adesso sentiremo da la Rosa. (a Emma) E ti cossa gastu? ti ga ancora i oci rossi!

Ad. Gnente, mama, se parlava del povaro Stefano.

Giov. Povera diavola, mi te compatisso, ma bisogna che ti vardi de superarte, de farte una razon almanco per to mama, cossa vustu? A sto mondo la xe sempre cussì... quei che more i xe i boni, e i pezo... i resta qua. (a Rosa che entra) E cussì chi xelo?

Rosa. Mah! Un signor che mi no lo go mai visto nè conossuo. El dise ch'el xe amigo del paron.

Giov. Che varda. (prende il biglietto, legge, getta un grido quasi, ma dominandosi subito) Gastu dito che no'l gh'è?

Rosa. Ghe lo go dito; ma lu el dise ch'el lo aspetaria volentiera.

Giov. No, rispondèghe che no'l gh'è, e che gnanca per ancùo no'l vegnarà!

Ad. Ma, mama, cossa disela?

Giov. (a Rosa). Va là, vogio cussì. Fa quelo che t'ò dito.

Rosa (uscendo). E po' s'el vien, la strapazzada intanto la ciaparò mi, no xe vero? (esce).

Ad. Ma sì, mama; percossa no vorla dirghe ch'el vegna un momento dessuso?

Giov. Perchè no riçevo... zente che no conosso!

Ad. Ma s'el xe quel'amigo ch'el spetava per andar al Lido insieme?

Giov. Ch'el diga quel ch'el vol, a casa mia comando mi.

Ad. (con tristezza). A proposito de quelo che la m'aveva promesso. Mama! no farghe osservazion.... no farghe dispeti... Andemo, Ema, persuadi anca ti la mama!

Emma (a cui Giovanna avrà fatto dei cenni). Cossa vustu Adele, co to mama vol cussì, la gavarà de le razon!

Ad. Ma che razon porla aver mai? (si volge a Giovanna che è sempre più agitata) Ma insoma, mama, cossa gala? la xe palida, agitada?

Giov. Mi? No go gnente!

Ad. Ma de chi xelo quel bilieto?

Giov. No t'ò dito? de uno che no conosso!

Ad. (vedendo il movimento). E percossa çerchela de scondarmelo alora?

Giov. Mi? No te scondo gnente!

Ad. La me lo daga, che leza, che veda.

Emma. Adele... andemo...

Ad. No! lo vogio! (con movimento rapido si alza, strappa il biglietto che invano sua madre cerca distruggere, legge subito, lo getta via quasi con ribrezzo, poi resta immobile, con gli occhi sbarrati, le mani nei capelli... — Nello stesso momento si sentono voci interne).

Emma (con ansia). Adele! Adele! per carità! Xe qua to mario!

Rosa (rientrando). Gaveva dito mi!

Giov. Cossa xe nato?

Rosa. El paron che proprio xe capità in quel momento che serava la riva...

SCENA XIV.

Marcello, Dette.

Marc. (entra accigliato, con fare impetuoso, rivolgendosi a Giovanna). E cussì? Chi lo ga mandà via? La xe stada ela, no xe vero?

Giov. Mi no go mandà via nissun; go dito solamente che no ghe geri.

Marc. E se anca no ghe gera, percossa no lo gala fato spetar? Ma no la lo saveva dunque? no ghe l'aveva dito fin da stamatina che ancùo doveva andar a disnar co' un amigo?

Giov. E giusto per questo credeva che no vegnissi gnanca più a casa.

Marc. No! perchè ghe lo gaveva anca dito, che forsi el saria vegnudo a torme qua per andar insieme al Lido.

Giov. Mi questo no lo go sentio.

Marc. No la vegna fora co' impianti. La diga piutosto che la lo ga fato aposta, sperando cussì de farme star a casa. Sì, la diga che la lo ga fato per farme dispeto. Ma la se ricorda ben che co' mi, no la la spunta miga.

Giov. Mi me par intanto, che vu dovaressi ricordarve che qua ghe xe l'Adele.

Marc. Eh! no la me seca!

Ad. Ema, condusi via la mama co' ti.

Emma. E cossa vustu far?

Ad. Vogio restar sola co lu. Va... va... te prego.

Emma. Siora Giovana, la vegna, la vegna co' mi, (Giovanna vorrebbe resistere, ma finisce per cedere all'insistenza di Emma ed escono insieme).

SCENA XV.

Marcello, Adele.

Ad. (trattenendo Marcello con affetto). E ti Marcelo, no esser inrabià, perchè la mama no ghe n'à colpa. Son stada mi!

Marc. Ah? ti ti xe stada? Go gusto de saverlo! Ti t'à fato de la lega anca ti! Cussì ti gavarà finio de reçitar la comedia.

Ad. Cossa distu? Marcelo, perdonime.

Marc. Ah! ma se a ti t'à comodà de butar via la mascara, varda ben che, caso mai, sarò capace de butarla via anca mi.

Ad. No, no dirlo gnanca per scherzo!

Marc. Lassime andar via!

Ad. No, resta, te prego!

Marc. Lassime, se no digo qualche sproposito.

Ad. No, ascoltime... varda, no posso movarme... vien qua... Senti Marcelo, mi no t'ò mai pregà de gnente, ti pol dirlo ti se go çercà sempre che gnanca el mio afeto te fusse de peso... ma sta volta te scongiuro, se xe vero che ti me vol ben, contentime! Xe la prima volta che te prego de qualcossa; vorressistu dirme de no proprio ancùo?

Marc. Mi voria saver che rèfolo te xe saltà stamatina...

Ad. Sì, stamatina go avudo torto de no dirte subito che me dispiaseva, ma no go avudo coragio! eco.... e po' no go pensà che al papà e ala mama ghe podesse dispiaser tanto! Xe per lori che te domando sto sacrifizio! Falo! i xe veci, ghe tien, e el dolor più grando che i me possa dar, xe quelo de sentirli dubitar del to afeto.

Marc. Ma per to pare e per to mare bisognaria che te stasse in zenocion davanti da la matina a la sera! e ancora no bastaria.

Ad. Oh, Marcelo, cossa distu! forse qualche volta i gavarà torto, no digo, ma bisogna compatirli: xe perchè ghe par che ti me trascuri, xe perchè i ga sempre paura che ti me vogi manco ben. Lori no sa, vedistu, lori no capisse che un omo come ti, pol voler ben l'istesso anca senza far tante smorfie...

Marc. Za per lori gavaria voludo un zenero sul stampo de Stefano, de quei che a la matina ghe porta el cafè in leto a so mugier. I xe quei che fa fortuna! I xe quei che morindo, i fa che la mugier se cava i cavei da la disperazion!

Ad. Ma cossa intendistu de dir? che mi no te vogio ben? Ma no ti sa dunque che mi te adoro? che ti ti xe tuto per mi, e che se qualche volta pianzo, no xe per mi, no, ma perchè voria vederte sempre contento, sempre de bonumor?

Marc. E xe per vederme contento che ancùo ti voressi che no andasse via? Xe per questo, no xe vero? che ti voressi farme far la figura del vilan verso un amigo che no vedo da diese ani?

Ad. Ma cossa te pol importar de sto amigo, che in tanti ani no to go mai sentio a nominar?

Marc. No lo gavarò nominà perchè s'avevimo perso de vista.

Ad. E adesso perchè el xe tornà, ti vol sentir tuto sto afeto? Oh no Marcelo, xe impossibile, tanto più che no ti sa gnanca s'el merita che ti ghe daghi la man!

Marc. Cossa ghe ne sastu ti?

Ad. Me lo ga dito Andrea.

Marc. Ah, ah! Andrea! Quel'orologier de Andrea, cossa t'alo dito?

Ad. Gnente, ma go capio.

Marc. El t'avarà dito ch'el xe capità qua co' una signora ch'el fa passar per scolara, e che magari invece la sarà qualcoss'altro. E cussì, cossa ghe xe de mal? La xe una signora che ghe xe morto el mario da dò mesi, e che per distrarse ga pensà de vegnir in Italia a passar l'ano de luto, insieme a lu.

Ad. Oh! Marcelo!

Marc. Ti ti voressi dunque che tute le vedove fusse come l'Ema che in tre ani no la s'à consolà un momento, che ancora quando la vien dentro par che la ghe diga a tuti: Vardème pur, ma no tochème, perchè mi son la statua del dolor! Oh! oh! de quele fortune ghe ne xe poche... e per disgrazia la doveva capitar proprio qua!

Ad. Cossa gh'entra che ti te la toghi co' l'Ema?

Marc. Sì, la ghe entra anca ela. Perchè no bastava to pare, to mare, no ti bastavi ti, che par sempre che te manca un'ora a morir, la ghe voleva anca ela, per render più alegra la casa. Oh! oh! Altro che Lido! A l'inferno andaria! E varda ben de no ridurme al punto che una volta andà, no gabia più da tornar...

Ad. No, Marcelo, no dirlo gnanca per sogno, che ti me fa morir!

Marc. No ti li ga lori? No te basta? No ti me lo ga dito ti, che xe per lori che ancùo ti me fa sta scena?

Ad. Una scena? Ma cossa vustu che fassa de manco de pregarte?

Marc. Ma xe per lori che ti insisti, xe per lori che ti me tormenti, perchè i xe lori che per poderla spuntar, i t'avarà montà la testa, i te mete suso. Ma za el torto xe mio, che doveva dir fin da prinçipio: o co' lori, o co' mi!

Ad. (trattenendo le lagrime, con suprema dolcezza). Senti Marcelo, de quelo forse la colpa xe stada mia, che no go avudo cuor de lassarli, e to pregà; ma se ti credi proprio de no poderte più trovar, de no poder più andar d'acordo, mi te giuro che son pronta a far qualunque sacrifizio. Sì, basta che ti me lo dighi. Vustu che ghe parla mi al papà e a la mama? I farà qualche lagrima, ma po' co ghe dirò che xe per el mio ben, i se adatarà, i se persuaderà. E alora, Marcelo, saremo soli, ti ti andarà dove che ti vol, e mi te tignarò drio dapertuto. Sì, saremo soli, e mi te lassarò quieto, libero, tranquilo; atorno de ti, mi caminarò sempre in ponta de piè, e ti alora ti lavorarà, ti tornarà contento come una volta. Oh! Marcelo, che feliçità sarà questa... Dime! Rispondime... Ma no ti me credi? Ma no ti sa dunque che ti ti xe quelo che ghe vogio più ben al mondo, e che per ti daria la vita!

Marc. Robe che se dise specialmente co se sta megio...

Ad. (con profonda amarezza). E no ti ga altra risposta da darme che questa? Ma percossa alora no vustu esser sinçero? Ma cossa gastu dunque? Percossa no vustu dir la verità? Percossa no vustu confessar che no xe no quei dò poveri veci, ma che son mi che no ti pol più sofrir? che son mi che te son deventada insoportabile? Oh xe un tòco che me ne gera acorta! che lo saveva! che ghe n'aveva avudo la prova... ma cercava ancora de iluderme, sperava ancora che in fondo al cuor te restasse un poco de pietà.

Marc. Cossa intendistu de dir?

Ad. Gnente, Marcelo, no domandarmelo, xe megio.

Marc. No, che anzi lo vogio saver, fora! sentimo, cossa xela sta prova?

Ad. Eben, sì, alora sapilo: quel giorno ch'el dotor ga voludo parlarte, mi me ne son acorta... e apena sè stai fora, go podudo strassinarme zo dal leto e vegnir fin a la porta. Eben, là go podudo sentir tuto! Go sentio che purtropo el t'à dito che son condanada, che questa che go xe la malatia de la povera mama, e che oramai per mi no la saria stada che question de tempo. E ti Marcelo! ti, no ti ga avudo da quel giorno gnanca una parola d'afeto, ti ga continuà a far la to solita vita, no ti ga avudo un fià de compassion. Ah! dilo dunque, dilo! che no ti ga gnanca pazienza de aspetar...

Marc. (con scatto di furore). Me pareva impossibile che no ti la butassi in tragico. Eben, alora lassime! (p. p.).

Ad. (con slancio, tornando affettuosa). No, Marcelo, resta te prego!

Marc. E percossa vustu obligarme a restar, se ti sà che te odio? No far almanco l'ipocrita!

Ad. No, te scongiuro, fermite! Ma cossa vustu che m'importa se anca no ti me vol ben? Mi me basta de podertene voler mi! Fermite un momento! Senti! se ti xe stufo de sta povera amalada, se no ti pol volerme ben come a una mugier, ah! lassa che almanco mi te ne vogia come una sorela! Mi me contento, e dime piutosto tuto quelo che ti ga, sì, perchè ti ga d'aver qualcossa... xe tanto tempo che te lezo nei oci, ti ti xe tanto cambià... dime Marcelo... confidite co' mi, te guro che se anca ti dovessi dirme che ti ghe vol ben a un'altra dona, mi no saria gelosa.

Marc. Ah, dasseno? Ti voressi far la brava a bon marcà? Ti sà ben che dei omeni come mi, le done no ghe ne sà cossa far... ghe vol Stefano, ghe vol Stefano!

Ad. Cossa intendistu dir, sempre co' Stefano?

Marc. Gnente, gnente... go scherzà! Perchè penso che dopo tuto el megio che ancora resta a far xe quela de butarla in rider.

Ad. Ma percossa te la tostu sempre co' quel povareto? Xe za la terza volta che ti lo nomini...

Marc. Sì, sì, xe vero... Ma lo go fato senza saver cussì.. no sò gnanca mi percossa... Andèmo, via... capisso anca mi che qualche volta m'imbestio per gnente, ma xe i nervi, xe perchè no son bon de lavorar. Eben! se ti vol, ancuo me fermarò a casa, cussì ti sarà contenta. Vol dir che invece ghe scriverò un bilieto per scusarme. (guarda sempre Adele che è immobile). No ti me ringrazii gnanca?

Ad. (con sforzo). Sì....

Marc. Ma adesso cossa gastu che ti me vardi cussì?

Ad. Mi... gnente...

Marc. A cossa pensistu?..

Ad. Ma gnente...

Marc. (con subito scatto). Varda ben che mi indovino, sà... cossa che te passa per la mente. (movimento d'Adele, con forza). E caso mai ti pensassi... guai a ti!

Ad. (indietreggia sempre con gli occhi fissi sopra di lui, senza parlare).

Marc. (la guarda un po', indi risoluto). Oh no! xe impossibile continuar cussì, xe megio finirla e una volta per sempre. (via).

SCENA XVI.

Adele, Andrea.

Ad. (dopo uscito Marcello, resta ancora muta, immobile, con gli occhi sbarrati come chi è in preda ad una suprema angoscia, poi si lascia cadere sospirando sopra una poltrona. In questo entra Andrea).

And. In studio no'l ghe gera, ma i m'à dito ch'el gera vegnudo a casa. (scorgendo Adele, avvicinandosi con premura). Cossa gh'è? cossa gala avudo?

Ad. Gnente.... gnente....

And. Ma se la xe palida... stala poco ben? Vorla che ciama la mama?

Ad. No, no'l ciama nissun! Me passarà. (si mette una mano sul cuore). No la xe che una poca de palpitazion. Oh Andrea! oh! Andrea...

And. Ma cossa xe nato? Gala visto Marcelo? Galo dito qualcossa?

Ad. Gnente! lu no me ga dito gnente... ma mi go capio tuto l'istesso.

And. Ela? e cossa gala capio? la me diga.

Ad. (come parlando a sè stessa). Ah Andrea! come da un momento a l'altro se vede tuto ciaro! Come che se vede da lontan! Me par che i me gabia cavà via una benda.

And. (con sospetto). Ma insoma, cossa vorla dir? Cossa s'ala messo in testa?

Ad. No importa Andrea... piutosto el ciama l'Ema. El ghe diga che la vegna un momento qua.

And. (sempre più comincia a comprendere). L'Ema? per cossa vorla l'Ema?

Ad. (smaniando). Sì, vogio vederla, vogio parlarghe, vogio... che la me vada a tor un poco de calmante...

And. Per quelo posso andar mi. La me diga indove ch'el xe.

Ad. No, Andrea, lu no sa, el ciama l'Ema.

And. E no saria megio che ciamasse so mama?

Ad. No! l'Ema, l'Ema, l'Ema! (dando in singhiozzi). O Andrea, el saveva dunque tuto anca lu, e no'l m'à mai dito gnente! Dunque xe proprio vero? Dunque per mi no ghe xe altro, altro, altro! per mi no me resta che morir! (sopraffatta dal dolore, abbandona il capo sulla spalliera della poltrona come chi sta per svenire).

And. (con ansia). Adele! Adele, per carità, no la se lassa andar in sta maniera! Ghe giuro mi che no xe vero gnente... ghe giuro che la s'à montà la testa. Andemo! la me scolta... la me creda! (vedendo che Adele non risponde corre alla porta e chiama). Siora Giovana! Siora Giovana!

SCENA XVII.

Giovanna, Detti.

Giov. (entra). Cossa gh'è?

And. L'Adele no se sente tanto ben...

Giov. (accorrendo). Adele! Adele! cossa gastu? cossa te sentistu? Oh Signor benedeto! Presto Andrea, el vaga a tor un poco del so calmante.

And. In dove xelo?

Giov. De là ne la so camera, el cora!

And. (via a destra).

Giov. Ma cossa xe nato? dime? Xe sta to mario? T'alo fato una scena? t'alo maltratà? galo voludo andar via l'istesso (Adele accenna di no). No?... e alora percossa xestu cussì? Xe ancora per quel maledeto bilieto che ti te disperi?... Oh! Adele mia, per questo no starte afanar che ghe pensarò mi... ti vedarà! a farlo tornar dove che l'è sta fin adesso — e ti no ti lo vederà gnanca, e nissun savarà gnanca più che l'esista a sto mondo. Coraggio! coraggio! e pensa piutosto a to papà, pensa ch'el xe drio a vegnir; che la Rosa xe andada a verzerghe proprio adesso, e che s'el te dovesse veder cussì, ti lo faressi morir da l'afano!

SCENA XVIII.

Rosa, Daniele, Dette, indi Andrea.

Dan. (a Rosa che lo precede con due bottiglie incartate in mano e sta per deporte sulla credenza). A pian, a pian che no le missiè, el xe vin vecio, el ga da servir a farghe un eviva a la paronçina (verso Adele). Oh berichina! ti ga volesto farme un'improvisata, ma anca mi, sastu, t'ò fato una improvisata! (trae dal soprabito un grosso involto).

And. (entra con una piccola fiala e cucchiaino). Eco el calmante. (Lo dà a Giovanna).

Dan. (con spavento andando alla poltrona). Cossa, stala mal?

Giov. (somministrando una cucchiaiata di calmante e incoraggiando Adele, che appena avrà sentito la voce del padre, avrà cercato di dominarsi con grande sforzo). Gnente... gnente... no gh'è gnente da spaventarse... la ga vossudo far trope bravae e cussì la se ga sentio un poco de perdimento.

Dan. E percossa mo' gastu voludo far trope bravae? Ti sa ch'el medico t'aveva tanto ordinà de star quieta... de no stancarte...

Giov. Andèmo, no afanève, che adesso ghe scominzia a passar... No xe vero, Adele mia, che te va via passando?

Ad. (con un filo di voce). Sì, mama...

Giov. (dandole un altro cucchiaino di calmante). Bevi, bevi ancora, Adele mia, bevi un altro poco, e po' varda to papà, povareto, che scaturio ch'el xe co' quel fagoto in man! Scometo ch'el ga un regaleto per ti... Vustu che ghe domandemo? (a Daniele) Andèmo... verzìlo, no vedè che la ga vogia de veder?

Dan. (con premura, commosso, aprendo l'involto). Sì, benedeta... varda! t'aveva comprà un abitin de quei de lana, perchè ti stassi calda, perchè ti fussi ben riparada....

Giov. (svolgendo la stoffa). Oh! varda, Adele mia, che bela stofa! de quele proprio che se usa... te lo faremo subito e ti vedarà che pulito! magari pregaremo l'Ema che la ne agiuta, perchè ela se ne intende, ela sa megio de nualtri certe cosse... Indove xela? (volgendosi a Daniele) Ciamèla, che la vegna a veder anca ela!

Ad. (trattenendo il padre). No, no, mama, adesso no.....

Giov. E percossa, angelo mio?

Ad. Perchè adesso no vogio star che co' lori, lori soli, sempre viçin de lori...

Dan. Oh cara!

Giov. Benedeta!

Dan. Sì, sempre co' to papà...

Giov. Sempre co' to mama!

Ad. (tenendosi sempre abbracciata, con angoscia). Oh papà! cossa gogio fato mi, a vegnir a sto mondo!

Giov. Che colpa ghe n'astu ti? Semo stai nualtri, cioè, mi no... ma xe l'istesso...

Ad. Sì, mama... perchè anca ela la me vol ben, no xe vero? e i me ne vorà sempre tuti dò, sempre, sempre! anca quando i altri s'avarà desmentegà de mi....

Dan. Ma che discorsi me fastu, Adele mia?

Ad. El me scusa papà... el me perdona... ma me sento tanto mal.. mal...

Dan. Ancora?

Ad. Sì, qua... un peso... no posso più respirar...

Dan. Coragio, coragio, Adele mia, che ti sà che dopo te passa...

Giov. Anca el dotor t'à dito che tuto in una volta no ti saressi miga guaria... sastu cossa?... vusta piutosto che andemo de là? Chissà che cavandote zozo, te passa più presto....

Ad. Sì, mama... i me compagna de là... che no veda nissun... altro che lori... e i me staga sempre viçin... sempre viçin...

Dan. (insieme a Giovanna, cercando con uno sforzo di sollevarla dalla poltrona e sorreggerla). Tachite a mi... Andrea, el ne agiuta lu (a Rosa). E vu, corè, andè presto a ciamar el medico. (Rosa esce, mentre Andrea lo aiuta).

Dan. (con Giovanna si avviano, sorreggendola). Adele mia, coragio!

Giov. Ti vedarà benedeta... (escono).

SCENA XIX.

Andrea, indi Emma.

And. (dopo aver seguito tristamente i tre fino a che son usciti, guardando dalla parte dov'è la stanza di Marcello). E dir che una volta no'l gavaria fato mal a una mosca, perchè el diseva che le ghe façeva pecà... e adesso invece no l'è sta contento fin che nol la ga copada! Oh! Marcelo! Marcelo! fa che no vegna el giorno del giudizio... perchè quel giorno no voria esser in ti... (mentre si avvia per uscire, incontra l'Emma che entra trafelata). La se ferma... dove vala?

Emma. Vado da l'Adele. La Rosa la m'à dito che la stà tanto mal...

And. No! la se ferma....

Emma. Ma percossa no vorlo che vada?

And. Perchè in sto momento xe megio lassarla sola, e che no la se fassa veder.

Emma. Ma perchè? Cossa xe nato? el me diga?

And. Eben... xe nato quel che doveva nasser: che oramai la så tuto... la ga capio tuto!

Emma. (con slancio). Chi? l'Adele? No, no, xe impossibile... ma come?

And. Mah!... la vada a domandarghelo a lu.

Emma. Oh Andrea!... e mi che gaveva pregà tanto el Signor... (scoppia in pianto).

And. Povere creature tute do!!

CALA LA TELA.